افغانستان کے شہر قندھار کی مرکزی ادویات مارکیٹ میں طالبان فورسز نے پاکستانی ادویات ضبط کرنے کے لیے دکانوں پر چھاپے مارے، جس کے خلاف تاجروں نے شدید احتجاج کیا۔ بیان میں دعویٰ کیا گیا ہے کہ احتجاج کے دوران فائرنگ سے متعدد افراد زخمی ہوئے، جبکہ کم از کم 22 تاجروں اور فارماسیوٹیکل عملے کے ارکان کو حراست میں لے لیا گیا۔ تاہم فائرنگ، زخمیوں اور گرفتاریوں سے متعلق ان تفصیلات کی آزاد ذرائع سے تصدیق نہیں ہو سکی ہے۔
رپورٹس کے مطابق طالبان کی اس کارروائی سے عام افغان شہریوں کی سستی اور بڑے پیمانے پر استعمال ہونے والی پاکستانی ادویات تک رسائی بری طرح متاثر ہو رہی ہے۔ دوسری جانب افغان وزارت صحت بھی ان ادویات کے متبادل کے طور پر قابلِ اعتماد اور کم قیمت ادویات کی فراہمی یقینی بنانے میں ناکام رہی ہے۔
دوطرفہ تجارتی تعلقات پر اثرات
جاری کردہ بیان میں کہا گیا ہے کہ افغان عوام پاکستان یا پاکستانی مصنوعات کے مخالف نہیں ہیں، بلکہ طالبان حکومت کی پالیسیوں کے باعث دونوں ملکوں کے درمیان تجارتی تعلقات متاثر ہو رہے ہیں۔ بیان میں کہا گیا ہے کہ طالبان انتظامیہ طاقت کے استعمال سے پاکستانی ادویات کی جگہ دیگر ممالک، بشمول بھارت سے درآمد ہونے والی ادویات کے لیے مارکیٹ میں گنجائش پیدا کر رہی ہے۔
پابندیوں کا تضاد
بیان کے مطابق ایک طرف سیکڑوں افغان شہری علاج کی غرض سے پاکستان کے میڈیکل ویزوں کے حصول کے خواہاں ہیں، تو دوسری جانب پاکستان میں تیار ہونے والی ادویات پر پابندیاں عائد کر کے انہیں ضبط کیا جا رہا ہے۔ بیان میں طالبان کے امیر ہیبت اللہ اخوندزادہ کے دور میں قندھار کے غریب شہریوں کے لیے سستی ادویات کی فراہمی محدود کرنے کی پالیسی کو عوامی مفاد کے منافی اور غیر اسلامی قرار دیا گیا ہے۔
