مکہ دفاعی اتحاد کی اسٹریٹجک، سیاسی و دفاعی کمیٹی کا ہنگامی اجلاس ریاض میں ہوا۔ اجلاس میں پاکستان، سعودی عرب اور ترکیہ کے اعلیٰ حکام نے شرکت کی۔
نائب وزیراعظم و وزیر خارجہ اسحاق ڈار، وزیر دفاع خواجہ آصف اور چیف آف آرمی اسٹاف و چیف آف ڈیفنس فورسز فیلڈ مارشل عاصم منیر بھی اجلاس میں شریک ہوئے۔
اجلاس میں سعودی عرب کی موجودہ سکیورٹی صورتحال پر غور کیا گیا۔ فریقین نے خطے کو درپیش خطرات اور تازہ صورتحال پر تبادلہ خیال کیا۔
فوجی دستوں کی فراہمی
مشترکہ اعلامیے کے مطابق تینوں ممالک نے اجتماعی دفاع کے وعدوں پر فوری عملدرآمد کا فیصلہ کیا۔ اس مقصد کیلئے سعودی عرب کو متفقہ فوجی دستے اور دفاعی صلاحیتیں فراہم کی جائیں گی۔ اعلامیے کے مطابق فوجی دستوں کی تیز رفتار تعیناتی یقینی بنائی جائے گی۔
اس اقدام سے عسکری تیاری اور باہمی تعاون مزید مضبوط ہوگا۔ فریقین نے خطرات سے نمٹنے کیلئے مشترکہ صلاحیت بڑھانے پر بھی اتفاق کیا۔
مکہ اور مدینہ کے تحفظ پر زور
اجلاس میں مکہ مکرمہ اور مدینہ منورہ کو نشانہ بنانے کی کوششوں کی شدید مذمت کی گئی۔ سعودی عرب کے شہروں، شہری تنصیبات اور اقتصادی مراکز پر حملوں کو بھی مسترد کیا گیا۔
پاکستان اور ترکیہ نے سعودی عرب کی خودمختاری اور علاقائی سالمیت کی حمایت کا اعادہ کیا۔ دونوں ممالک نے سعودی مسلح افواج کی تیاری اور پیشہ ورانہ صلاحیتوں کو بھی سراہا۔
اجلاس میں سیاسی اور عسکری مشاورتی عمل کے نتائج کا جائزہ لیا گیا۔ کمیٹی نے پیش کی گئی سفارشات کی بھی منظوری دی۔
اعلامیے کے مطابق مکہ دفاعی اتحاد اجتماعی دفاع کے عزم کی عکاسی کرتا ہے۔ اس کا مقصد تینوں ممالک کی سلامتی اور علاقائی استحکام کو مزید مضبوط بنانا ہے۔
اجلاس میں لیفٹیننٹ جنرل نعمان محمود (ر) کی مکہ دفاعی اتحاد کے پہلے سیکرٹری جنرل کے طور پر نامزدگی کی بھی توثیق کی گئی۔