سکیورٹی فورسز نے خیبرپختونخوا کے ضلع شمالی وزیرستان میں فتنہ الخوارج کے خلاف کارروائی کرتے ہوئے 4 اہم دہشت گرد کمانڈرز سمیت 9 دہشت گردوں کو ہلاک کردیا۔
سکیورٹی ذرائع کے مطابق فورسز نے شمالی وزیرستان کے علاقوں پلنگ زئی، ندیم کوٹ اور کوٹ خضری میں انٹیلی جنس کی بنیاد پر کارروائیاں کیں۔ کارروائی کے دوران فتنہ الخوارج کے 9 دہشت گرد مارے گئے۔
ذرائع کے مطابق ہلاک ہونے والوں میں اہم دہشت گرد کمانڈرز خالد رضا، کامران، موسیٰ اور مفتوم بھی شامل ہیں۔ کارروائی کے دوران دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔
سکیورٹی ذرائع کا کہنا ہے کہ کارروائیوں کے دوران فتنہ الخوارج کے متعدد ٹھکانے بھی تباہ کیے گئے۔ یہ کارروائیاں خیبرپختونخوا میں دہشت گردی کے خلاف جاری سکیورٹی آپریشن کا حصہ ہیں۔
وزیراعظم شہباز شریف نے شمالی وزیرستان میں کامیاب کارروائی پر سکیورٹی فورسز کے افسران اور اہلکاروں کو خراج تحسین پیش کیا۔ انہوں نے 4 اہم کمانڈرز سمیت 9 دہشت گردوں کی ہلاکت پر فورسز کی پیشہ ورانہ صلاحیتوں کو سراہا۔
وزیراعظم نے کہا کہ دہشت گردی کے خلاف سکیورٹی فورسز کی کامیاب کارروائیاں ملک سے دہشت گردی کے مکمل خاتمے کے عزم کی عکاس ہیں۔ انہوں نے کہا کہ دہشت گردوں کو ملک میں بدامنی پھیلانے اور اپنے مذموم عزائم میں کامیاب نہیں ہونے دیا جائے گا۔