امریکی صدر ڈونلڈ ٹرمپ امریکا اور اسرائیل میں انتخابات کے بعد ایران کے خلاف بڑے حملوں کا حکم دے سکتے ہیں۔ امریکی جریدے بلومبرگ نے اپنی رپورٹ میں یہ دعویٰ کیا ہے۔
بلومبرگ کے مطابق ٹرمپ کے حالیہ بیانات سے ظاہر ہوتا ہے کہ امریکا میں وسط مدتی انتخابات سے پہلے ایران پر دوبارہ حملوں کا امکان کم ہے۔ تاہم مشرق وسطیٰ میں جنگ کے مزید شدت اختیار کرنے کے خدشات ظاہر کیے جا رہے ہیں۔
رپورٹ کے مطابق ٹرمپ نے پہلے کہا تھا کہ مشرق وسطیٰ میں جنگ چند ہفتوں میں ختم ہو جائے گی، لیکن اب صورت حال مختلف دکھائی دے رہی ہے۔
بلومبرگ نے دعویٰ کیا ہے کہ امریکا تیسرا طیارہ بردار بحری بیڑہ اور مزید 10 ہزار میرینز خلیج کی جانب روانہ کر چکا ہے۔ دوسری جانب مشرق وسطیٰ میں ان امریکی فوجی اڈوں پر تعینات عملے کی تعداد مبینہ طور پر کم کی گئی ہے جنہیں ایرانی جوابی حملوں میں نقصان پہنچا تھا۔
بروکنگز انسٹی ٹیوٹ سے وابستہ مشرق وسطیٰ کے ایک ماہر کے مطابق، موجودہ حالات میں جنگ دوبارہ شروع ہونے اور بڑے پیمانے پر فضائی بمباری کے خدشات موجود ہیں۔
انٹرنیشنل کرائسس گروپ کے مشرق وسطیٰ کے ماہر علی واعظ نے بھی خدشہ ظاہر کیا ہے کہ ٹرمپ اور اسرائیلی وزیراعظم بنیامین نیتن یاہو ایران کے ساتھ جنگ کو اپنی سیاسی مشکلات سے نکلنے کے راستے کے طور پر دیکھ سکتے ہیں۔
علی واعظ کے مطابق، سیاسی مستقبل بچانے کے لیے شروع کی جانے والی جنگ الٹا دونوں رہنماؤں کے سیاسی مستقبل کے لیے نقصان دہ ثابت ہو سکتی ہے۔
رپورٹ میں بتایا گیا ہے کہ اسرائیل میں 27 اکتوبر کو انتخابات شیڈول ہیں، جبکہ امریکا میں 3 نومبر کو وسط مدتی انتخابات ہوں گے۔ ان انتخابات کے بعد ایران کے خلاف ممکنہ امریکی اور اسرائیلی اقدامات پر توجہ مرکوز کی جا رہی ہے۔
