سنگاپور کے وزیر خارجہ ڈاکٹر ویوین بالاکرشنن نے جی ایچ کیو راولپنڈی کا دورہ کیا، جہاں انہوں نے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے ملاقات کی۔
آئی ایس پی آر کے مطابق ملاقات میں پاکستان اور سنگاپور کے دوطرفہ تعلقات، باہمی دلچسپی کے امور اور علاقائی و عالمی سلامتی کی صورتحال پر تبادلہ خیال کیا گیا۔
ملاقات میں دونوں ممالک کے درمیان تعاون کو مزید فروغ دینے کے امکانات پر بھی بات چیت ہوئی۔ اس موقع پر علاقائی امن و استحکام سے متعلق امور پر خیالات کا تبادلہ کیا گیا۔
آئی ایس پی آر کے مطابق دونوں جانب سے مشترکہ مفادات کے شعبوں میں مسلسل رابطوں اور تعاون کی اہمیت پر زور دیا گیا۔
فیلڈ مارشل سید عاصم منیر نے سنگاپور کے ساتھ تعلقات مضبوط بنانے کے لیے پاکستان کے عزم کا اعادہ کیا۔ انہوں نے کہا کہ ادارہ جاتی روابط اور تعمیری بات چیت کا فروغ علاقائی امن، استحکام اور سلامتی کے لیے اہم ہے۔
سنگاپور کے وزیر خارجہ ڈاکٹر ویوین بالاکرشنن نے بھی دوطرفہ تعلقات مزید مستحکم بنانے کے عزم کا اظہار کیا۔ انہوں نے پاک فوج کی پیشہ ورانہ صلاحیتوں کو سراہا اور علاقائی امن و استحکام کے لیے پاکستان کی کوششوں کا اعتراف کیا۔
