شاعر مشرق اور مفکر پاکستان علامہ محمد اقبال کا 149 واں یوم ولادت آج ملک بھر میں منایا جا رہا ہے۔ اس موقع پر ملک بھر میں تقریبات کا اہتمام کیا گیا ہے، جبکہ 9 نومبر کو یوم اقبال کے سلسلے میں عام تعطیل ہے۔
لاہور میں مزار اقبال پر گارڈز کی تبدیلی کی پروقار تقریب منعقد ہوئی، جس میں پاک بحریہ کے چاق و چوبند دستے نے اعزازی گارڈز کے فرائض سنبھال لیے۔ پاکستان نیوی کے اسٹیشن کمانڈر لاہور کموڈور مصباح الامین تقریب کے مہمان خصوصی تھے۔
تقریب کے دوران پاکستان رینجرز پنجاب اور پاک بحریہ کے دستوں کا معائنہ کیا گیا۔ اس موقع پر پاکستان رینجرز پنجاب کا دستہ اپنے فرائض سے سبکدوش ہو کر رخصت ہوگیا۔
گارڈز کی تبدیلی کے بعد چیف آف دی نیول اسٹاف ایڈمرل نوید اشرف، پاک بحریہ کے افسران، سیلرز اور نیوی کے سویلین ملازمین کی جانب سے مزار اقبال پر پھولوں کی چادر چڑھائی گئی۔ کموڈور مصباح الامین نے مہمانوں کی کتاب میں اپنے تاثرات بھی قلمبند کیے۔
علامہ محمد اقبال 9 نومبر 1877 کو سیالکوٹ میں پیدا ہوئے۔ انہوں نے ابتدائی تعلیم سیالکوٹ اور لاہور سے حاصل کی، بعد ازاں اعلیٰ تعلیم کے لیے یورپ گئے، جہاں برطانیہ سے وکالت اور جرمنی سے فلسفے میں پی ایچ ڈی کی ڈگری حاصل کی۔
علامہ اقبال نے اپنی شاعری اور فکر کے ذریعے برصغیر کے مسلمانوں میں سیاسی و فکری بیداری پیدا کرنے میں اہم کردار ادا کیا۔ ان کے تصور نے مسلمانوں کے لیے ایک الگ وطن کے قیام کی فکری بنیاد فراہم کی۔ نوجوانوں کو خودی، خود اعتمادی اور بلند حوصلے کا پیغام دینا بھی ان کی شاعری کا نمایاں موضوع رہا۔
ان کے مشہور شعری مجموعوں میں بانگ درا، بال جبریل، ضرب کلیم، زبور عجم، جاوید نامہ اور پیام مشرق شامل ہیں۔ علامہ محمد اقبال 21 اپریل 1938 کو لاہور میں انتقال کر گئے تھے، جہاں انہیں بادشاہی مسجد کے قریب سپرد خاک کیا گیا۔
