اینکر ربیعہ احسن کا قتل اور چار دیواری کے پیچھے چھپے سوال
راولپنڈی کے علاقے گلشن آباد کے ایک گھر میں 8 نومبر کی دوپہر ایک گولی چلی اور اس کی گونج نے ایک پورا گھرانہ اجاڑ دیا۔ نجی ٹی وی چینل 92 نیوز سے وابستہ اینکر پرسن ربیعہ احسن اپنے ہی بیڈ روم میں خون میں لت پت پائی گئیں۔ وہ چہرہ جو اسکرین پر اعتماد اور وقار کے ساتھ خبریں پڑھتا تھا، اب ایک ایسی خبر بن چکا ہے جو ہر دیکھنے اور سننے والے کو جھنجھوڑ رہی ہے۔ ایک ہنستی بستی زندگی، دو معصوم بیٹیاں اور ایک پورا خاندان، سب کچھ چند لمحوں میں بکھر گیا۔
ایف آئی آر کے مطابق واقعہ دوپہر تقریباً ڈھائی بجے کا ہے۔ ربیعہ کی والدہ اور بہن گھر کے لان میں موجود تھیں، جبکہ ربیعہ اور ان کے شوہر بیڈ روم میں تھے۔ اچانک کمرے سے فائر کی آواز آئی۔ ماں اور بیٹی بھاگ کر اندر پہنچیں تو ربیعہ فرش پر خون میں لت پت پڑی تھیں اور شوہر کے ہاتھ میں پستول تھا۔ مقتولہ کے بھائی خرم احمد کی مدعیت میں شوہر احسن طاہر کے خلاف دفعہ 302 اور پنجاب آرمز ترمیمی آرڈیننس کی متعلقہ دفعہ کے تحت مقدمہ درج کر لیا گیا۔ پولیس کے مطابق پستول کا کوئی لائسنس یا اجازت نامہ بھی پیش نہیں کیا گیا۔
شوہر کا ابتدائی مؤقف یہ ہے کہ گولی اتفاقیہ چل گئی۔ مگر بعض رپورٹس کے مطابق گولی تقریباً چار فٹ کے فاصلے سے چلی اور گردن میں لگی۔ ایف آئی آر میں زخم کا ذکر گلے کے نیچے اور پشت پر ہے۔ ایسے میں سوال اٹھتا ہے کہ کیا کوئی اتفاقیہ گولی اتنے فاصلے سے سیدھی گردن کا نشانہ لے سکتی ہے؟ اس سوال کا حتمی جواب فرانزک رپورٹ، پوسٹ مارٹم اور تفتیش ہی دے سکیں گے۔ اسی لیے ہمیں نتیجہ اخذ کرنے میں جلد بازی سے گریز کرنا ہوگا، کیونکہ جرم ثابت کرنا عدالت کا کام ہے۔
کچھ رپورٹس میں یہ بھی سامنے آیا ہے کہ اس دن پارلر کے اخراجات پر میاں بیوی میں تلخ کلامی ہوئی جو طول پکڑ گئی، حالانکہ ایک خبر میں پولیس ذرائع کے حوالے سے کہا گیا کہ دونوں میں ناچاقی نہیں تھی۔ ایک اور بات جو توجہ طلب ہے، وہ یہ کہ فائر کے تقریباً ایک گھنٹے بعد پولیس کو ون فائیو پر اطلاع دی گئی۔ اگر یہ درست ہے تو یہ تاخیر بھی تفتیش کا اہم نکتہ بنتی ہے۔ ایک گھر جہاں زخمی بیوی فرش پر پڑی ہو، وہاں ایک گھنٹے کی خاموشی کئی سوالات کو جنم دیتی ہے۔ یہ تمام باتیں فی الحال رپورٹس اور دعووں کی حد تک ہیں اور ان کی تصدیق تحقیقات سے ہونا باقی ہے۔
ہمارے معاشرے میں شوہر کو مجازی خدا، محافظ اور سائبان کہا جاتا ہے۔ شوہر کا اصل کردار تو مددگار، رفیق اور ہمسفر کا ہے، وہ جو مشکل میں ڈھال بنے اور کمزور لمحوں میں سہارا دے۔ لیکن جب یہی محافظ ہاتھ میں پستول لیے کھڑا ہو اور سامنے اس کی شریکِ حیات خون میں نہائی پڑی ہو، تو یہ رشتے کے تقدس پر ایک گہرا سوالیہ نشان ہے۔ مددگار اور مکار کے درمیان فرق اکثر چار دیواری کے اندر ہی کھلتا ہے، جہاں کوئی کیمرہ نہیں ہوتا اور کوئی گواہ نہیں ہوتا۔
یہاں ایک اور پہلو بھی قابلِ ذکر ہے۔ رپورٹس کے مطابق ربیعہ کے شوہر گھر داماد تھے، یعنی اپنی بیوی کے میکے میں، اس کی والدہ اور بہنوں کے ساتھ رہتے تھے۔ ہمارے ہاں اس انتظام کو اکثر طعنوں اور احساسِ کمتری سے جوڑ دیا جاتا ہے۔ ممکن ہے اس رشتے میں کچھ ایسی نفسیاتی کشمکش رہی ہو جو ظاہری آنکھ سے اوجھل تھی، مگر یہ محض قیاس ہے، اور کسی بھی قیاس کو اس سنگین واردات کا جواز نہیں بنایا جا سکتا۔ گھر داماد ہونا کوئی جرم نہیں، اور نہ ہی کسی بھی صورت میں تلخی یا انا کی لڑائی کسی کی جان لینے کا حق دیتی ہے۔
ربیعہ احسن کے ساتھ کام کرنے والے ساتھی انہیں ایک انتہائی پروفیشنل اینکر کے طور پر یاد کرتے ہیں۔ انہوں نے نیوز اینکرنگ سے آغاز کیا، پھر پروگرامنگ ڈیپارٹمنٹ میں گئیں اور بعد ازاں 92 نیوز سے وابستہ ہوئیں۔ اسٹوڈیو کی روشنیوں اور کیمروں کے پیچھے ایک تاریک پہلو بھی ہوتا ہے، گھریلو پریشانیوں اور نفسیاتی الجھنوں کا، جسے مسکراتے چہرے اور میک اپ کی تہیں چھپا لیتی ہیں۔ ہم اسکرین پر نظر آنے والوں کو بہت مضبوط سمجھتے ہیں، مگر کبھی نہیں سوچتے کہ وہ گھر لوٹ کر کن حالات سے گزرتے ہوں گے۔ ربیعہ کی کہانی ہمیں یہ یاد دلاتی ہے کہ کامیابی اور عزت کا مطلب یہ نہیں کہ انسان اندر سے محفوظ بھی ہو۔
اس سانحے کا سب سے دردناک پہلو وہ دو معصوم بیٹیاں ہیں جنہوں نے اپنی ماں کی لاش دیکھی اور زار و قطار روتی رہیں۔ ان کی ماں قبر میں اتار دی گئی اور باپ حوالات میں ہے۔ وہ بچیاں اب نہ ماں کی گود پا سکیں گی اور نہ باپ کا سایہ۔ ان کے ذہنوں پر اس منظر کے جو نقوش ثبت ہوئے ہیں، وہ شاید عمر بھر نہ مٹ سکیں۔ ریاست، معاشرے اور خاندان کی ذمہ داری ہے کہ ان بچیوں کی نفسیاتی بحالی اور تحفظ کو یقینی بنائے۔ انصاف کا تقاضا صرف مجرم کو سزا دینا نہیں، ان بے قصور بچیوں کو سنبھالنا بھی ہے۔
یہ واقعہ ہمیں یہ بھی سوچنے پر مجبور کرتا ہے کہ ہمارے گھروں میں غیر لائسنس یافتہ اسلحہ کتنی آسانی سے موجود ہے۔ پستول جو حفاظت کے نام پر رکھا جاتا ہے، اکثر اپنوں ہی کی جان لے لیتا ہے۔ گھریلو جھگڑوں میں اسلحے کی موجودگی کسی بھی معمولی تلخی کو ناقابلِ تلافی سانحے میں بدل سکتی ہے۔ ضرورت اس بات کی ہے کہ اسلحے کے لائسنس اور اس کے محفوظ استعمال کے قوانین پر سختی سے عمل ہو، اور ساتھ ہی گھریلو تنازعات کے حل کے لیے مشاورت اور نفسیاتی معاونت کا کلچر فروغ پائے۔
دیکھیے: علامہ اقبال: ایک خواب، ایک فکر
