سکیورٹی فورسز اور پولیس نے مشترکہ انٹیلیجنس بیسڈ آپریشن میں افغان شہری حکمت اللہ عرف حمزہ کو گرفتار کیا ہے۔ حکام کے مطابق گرفتار ملزم نے افغان آرمی سے کمانڈو تربیت حاصل کی اور پاکستان میں خودکش حملہ آور تیار کرنے کا اعتراف کیا ہے۔
مشیر اطلاعات اے آر ڈی سی محمود جان بابر نے پریس کانفرنس کرتے ہوئے کہا کہ افغانستان کی سرزمین پاکستان میں دہشت گردی کے لیے استعمال ہو رہی ہے۔ دہشت گرد رات کی تاریکی کا فائدہ اٹھانے کی کوشش کرتے ہیں، تاہم سکیورٹی فورسز ان کے خلاف بھرپور کارروائیاں کر رہی ہیں۔
پریس کانفرنس میں ایڈیشنل آئی جی اے آر ڈی سی عباس احسن نے بتایا کہ گرفتار ملزم کی شناخت حکمت اللہ عرف حمزہ ولد نور محمد کے نام سے ہوئی ہے، جس کا تعلق افغان صوبے پکتیا سے ہے۔ اسے انٹیلیجنس بیسڈ آپریشن کے دوران گرفتار کیا گیا۔
افغانستان سے تربیت
عباس احسن کے مطابق گرفتار ملزم نے افغان آرمی میں کمانڈو تربیت حاصل کی تھی۔ وہ خارجی کمانڈر منصور کے ساتھ بطور سکیورٹی گارڈ بھی کام کر چکا ہے۔ حکام کا کہنا ہے کہ ملزم نے ایک خودکش حملہ آور کو بھی تیار کیا تھا۔
پریس کانفرنس میں گرفتار ملزم کا ویڈیو بیان بھی جاری کیا گیا، جس میں اس نے افغانستان میں طالبان کے دور میں زخمی ہونے کا ذکر کیا۔
حملہ آور تیار کرنے کا اعتراف
ویڈیو بیان میں حکمت اللہ نے بتایا کہ اس نے ایک سال مفتی کے ساتھ تعلیم حاصل کی اور بعد ازاں ایک مدرسے میں تدریس شروع کر دی۔ اس دوران اس کی جلال آباد میں اکرمہ نامی شخص سے ملاقات ہوئی۔
گرفتار ملزم نے اپنے بیان میں اعتراف کیا کہ اس نے اکرمہ کو خودکش حملے کے لیے تیار کیا تھا۔ اس نے مزید کہا کہ پاکستان میں اس کے ساتھ اچھا سلوک کیا جا رہا ہے۔
حکام کے مطابق گرفتار ملزم سے حاصل ہونے والی معلومات اور شواہد کی روشنی میں دہشت گردی سے متعلق مزید تحقیقات جاری ہیں۔
