ایرانی وزیر خارجہ عباس عراقچی نے ایران اور امریکا کے درمیان مذاکرات میں پاکستان کے سفارتی کردار پر اعتماد کا اظہار کرتے ہوئے کہا ہے کہ تہران اسلام آباد کو اپنا اچھا دوست سمجھتا ہے۔
عراقچی نے کہا کہ ایران اور امریکا کے درمیان مذاکرات اور مسائل کا حل ایک پیچیدہ اور مشکل معاملہ ہے، تاہم پاکستان اپنی ذمہ داریاں ادا کر رہا ہے اور ایران کو اپنے پاکستانی بھائیوں پر اعتماد ہے۔
انہوں نے پاکستان کو اچھا دوست قرار دیتے ہوئے کہا کہ ایران پاکستان کی کوششوں پر بھروسا کرتا ہے۔
یہ بیان ایسے وقت میں سامنے آیا ہے جب عباس عراقچی 30ویں اقتصادی تعاون تنظیم (ای سی او) کے وزرائے خارجہ اجلاس میں شرکت کے لیے اسلام آباد میں موجود ہیں۔ انہوں نے اجلاس کے موقع پر پاکستانی اور تاجک ہم منصبوں سے بھی مختصر ملاقاتیں کیں۔
پاکستان کے نائب وزیراعظم اور وزیر خارجہ اسحاق ڈار نے بھی اجلاس کے دوران کہا کہ پاکستان ایران اور امریکا کے درمیان کشیدگی کم کرنے اور تنازعات کے حل کے لیے مذاکرات اور سفارت کاری کی کوششیں جاری رکھے گا۔
عراقچی کا یہ اظہارِ اعتماد پاکستان اور ایران کے درمیان سفارتی رابطوں کی اہمیت کو اجاگر کرتا ہے، جبکہ اسلام آباد کی جانب سے واشنگٹن اور تہران کے درمیان بات چیت کے فروغ کی کوششیں بھی جاری ہیں۔





