وزیراعظم شہباز شریف نے اسلام آباد میں ای سی او کے رکن ممالک کے وزرائے خارجہ اور وفود کے سربراہان سے ملاقات کی، جس میں ایرانی وزیر خارجہ عباس عراقچی بھی شریک تھے۔ ملاقات میں علاقائی تعاون، تجارت، سرمایہ کاری اور روابط کے فروغ پر تبادلہ خیال کیا گیا۔
اسلام آباد میں ہونے والی اس ملاقات کے بعد پاکستان کی دو سالہ ای سی او صدارت کے دوران علاقائی روابط اور اقتصادی تعاون کو آگے بڑھانے کے لیے مشترکہ اقدامات پر بھی زور دیا گیا۔ پاکستان نے 2026 سے 2027 تک تنظیم کی صدارت سنبھالی ہے، جبکہ اس مدت کے لیے علاقائیت کی بحالی، مضبوط اور مستحکم ای سی او کا عنوان مقرر کیا گیا ہے۔
Prime Minister Muhammad Shehbaz Sharif meets the Foreign Ministers and Heads of Delegations of ECO member states, participating in the 30th meeting of ECO Council of Ministers.#ECOInPakistan pic.twitter.com/HXnGWLqLB2
— Prime Minister's Office (@PakPMO) November 16, 2026
عباس عراقچی کا بیان
ای سی او اجلاس میں ایرانی وزیر خارجہ عباس عراقچی نے بھی شرکت کی اور علاقائی تعاون کو مزید مضبوط بنانے کی ضرورت پر زور دیا۔ انہوں نے تجارت، ٹرانسپورٹ اور توانائی کو تنظیم کے درمیان تعاون کے تین اہم ستون قرار دیا۔
عراقچی کے مطابق رکن ممالک کے درمیان بہتر رابطوں، باہمی تجارت اور توانائی کے شعبے میں تعاون سے خطے کو بیرونی دباؤ اور عالمی غیر یقینی صورت حال کے اثرات سے نمٹنے میں مدد مل سکتی ہے۔ انہوں نے علاقائی مسائل کے حل کے لیے رابطوں اور سفارت کاری کی اہمیت بھی اجاگر کی۔
پاکستان کی ترجیحات
وزیراعظم شہباز شریف نے ای سی او کے 30ویں وزارتی اجلاس کے کامیاب انعقاد اور اسلام آباد اعلامیے کی منظوری کا خیرمقدم کیا۔ اجلاس میں اقتصادی تعاون کے لیے 2026 سے 2035 تک کے اسٹریٹجک اہداف بھی منظور کیے گئے۔
وزیراعظم نے کہا کہ پاکستان اپنی صدارت کے دوران تنظیم کے مشترکہ اہداف کو عملی اقدامات میں تبدیل کرنے کے لیے تمام رکن ممالک کے ساتھ مل کر کام کرے گا۔ انہوں نے تجارت، سرمایہ کاری، ٹرانسپورٹ، توانائی، انفارمیشن ٹیکنالوجی اور پائیدار ترقی کے شعبوں میں تعاون بڑھانے پر زور دیا۔
انہوں نے کہا کہ ای سی او کے موجودہ معاہدوں پر مؤثر عمل درآمد اور ادارہ جاتی نظام کو مضبوط بنانا علاقائی اقتصادی انضمام کے لیے ضروری ہے۔
پاکستان کی جغرافیائی اہمیت کا ذکر کرتے ہوئے وزیراعظم نے سڑکوں، ریلوے اور دیگر ذرائع نقل و حمل کے ذریعے علاقائی رابطوں کو وسعت دینے کے عزم کا اظہار کیا۔ ان منصوبوں میں کراچی، پورٹ قاسم اور گوادر کی بندرگاہوں کے ذریعے خشکی میں گھرے ای سی او رکن ممالک کو عالمی منڈیوں تک رسائی فراہم کرنا بھی شامل ہے۔
وزیراعظم نے علاقائی تنازعات کے پُرامن حل کے لیے مکالمے اور سفارت کاری کی اہمیت پر زور دیتے ہوئے سکیورٹی خطرات سے نمٹنے کے لیے مشترکہ کوششوں پر بھی زور دیا۔
انہوں نے رکن ممالک کو لاہور کو 2027 کے لیے ای سی او کا سیاحتی دارالحکومت قرار دیے جانے کی مناسبت سے تقریبات میں شرکت کی دعوت دی۔ شہباز شریف نے کہا کہ پاکستان اپنی صدارت کے دوران ای سی او کے تمام رکن ممالک اور سیکریٹریٹ کے ساتھ قریبی تعاون جاری رکھے گا اور 2027 میں اگلے وزرائے خارجہ اجلاس اور سربراہی اجلاس کی میزبانی کے لیے بھی تیار ہے۔





