امریکی صدر ڈونلڈ ٹرمپ نے ایران کے خلاف ممکنہ فوجی کارروائی سے متعلق فیصلہ نئے سال کے آغاز تک مؤخر کرنے کا عندیہ دیا ہے۔
انٹرویو دیتے ہوئے صدر ٹرمپ نے کہا کہ ایران کے حوالے سے آئندہ حکمت عملی کا فیصلہ یکم جنوری کے بعد کیا جائے گا۔ ان کا کہنا تھا کہ وہ اس معاملے میں کوئی عجلت نہیں کر رہے اور نئے سال کے آغاز پر پیدا ہونے والی صورت حال کا جائزہ لیں گے۔
صدر ٹرمپ نے دعویٰ کیا کہ امریکا ایران کا جوہری پروگرام روک چکا ہے، جس کے بعد تہران کے لیے جوہری ہتھیار تیار کرنا مزید مشکل ہوگیا ہے۔ ان کے بقول ایران اب کیمیائی گیسوں اور دیگر ذرائع پر توجہ دے رہا ہے۔
ایران کے خلاف ممکنہ نئے حملے کے وقت سے متعلق سوال پر ٹرمپ نے کہا کہ اس بات کا امکان بھی موجود ہے کہ کارروائی اسی وقت کی جائے جب رواں سال فروری کے آغاز میں جنگ شروع کی گئی تھی۔
دوسری جانب خبر رساں ادارے رائٹرز کے مطابق اسرائیل نے ایران کی مبینہ کیمیائی ہتھیاروں کی تیاری سے متعلق انٹیلی جنس معلومات امریکا کو فراہم کی ہیں۔
رپورٹ کے مطابق موساد کے سربراہ نے اپنے حالیہ دورہ امریکا کے دوران ایران کے خلاف مشترکہ حملوں کا سلسلہ دوبارہ شروع کرنے کی حمایت کی۔
تاہم ایران اس سے قبل واشنگٹن میں ممکنہ کیمیائی حملوں سے متعلق میڈیا رپورٹس کو بے بنیاد قرار دے کر مسترد کر چکا ہے۔
دیکھیے ؛ ایران کے ساتھ طویل جنگ نہیں ہونے دیں گے، جے ڈی وینس





