روسی صدر کے دفتر (کریملن) نے اعلان کیا ہے کہ صدر ولادیمیر پیوٹن آج بروز جمعرات ماسکو میں مختلف ممالک کے سفیروں کی اسنادِ سفارت وصول کریں گے۔ جاری کردہ فہرست کے مطابق امارتِ اسلامیہ افغانستان کی جانب سے روس کے لیے نامزد سفیر گل حسن حسن بھی ان سفیروں میں شامل ہیں جن کی اسناد صدر پیوٹن وصول کریں گے۔
سفارتی ماہرین کے مطابق یہ اقدام روس اور افغانستان کے درمیان بڑھتے ہوئے سفارتی روابط کی عکاسی کرتا ہے اور اسے طالبان حکومت کی عالمی سطح پر تدریجی قبولیت کی جانب ایک اہم پیش رفت قرار دیا جا رہا ہے۔
ذرائع کا کہنا ہے کہ اگرچہ روس نے تاحال امارتِ اسلامیہ کو باضابطہ طور پر تسلیم نہیں کیا، تاہم اسنادِ سفارت کی وصولی کو عملی سطح پر سفارتی روابط کو مضبوط بنانے کی علامت سمجھا جا رہا ہے۔ اس پیش رفت سے دونوں ممالک کے درمیان سیاسی، معاشی اور علاقائی امور پر تعاون کے امکانات میں اضافہ متوقع ہے۔
واضح رہے کہ حالیہ مہینوں میں روس اور افغانستان کے درمیان رابطوں میں اضافہ دیکھا گیا ہے، جن میں سیکیورٹی، تجارت اور علاقائی استحکام جیسے موضوعات شامل ہیں۔ مبصرین کے مطابق یہ قدم خطے میں بدلتی ہوئی سفارتی حرکیات کی نشاندہی کرتا ہے۔
دیکھیں: افغانستان انٹرنیشنل کی تحقیقات: طالبان اراکین نے متعدد صوبوں میں غیر قانونی قتل کیے