باجوڑ: افغانستان کے صوبہ کنڑ سے افغان سرحدی فورسز کی جانب سے پاکستان کی طرف مارٹر گولے داغے جانے کی اطلاعات سامنے آئی ہیں، جس سے سرحدی علاقوں میں کشیدگی بڑھ گئی ہے۔
مقامی ذرائع کے مطابق چار مارٹر گولے ضلع باجوڑ کے سرحدی علاقے لغڑی میں گرے، تاہم خوش قسمتی سے گولے آبادی سے کچھ فاصلے پر کھلے علاقوں میں گرے جس کے باعث کوئی جانی یا مالی نقصان نہیں ہوا۔
علاقہ مکینوں کا کہنا ہے کہ گولہ باری کے بعد علاقے میں خوف و ہراس پھیل گیا، جبکہ سکیورٹی صورتحال پر تشویش بڑھ گئی ہے۔
واقعے کے بعد حکام صورتحال کا جائزہ لے رہے ہیں، جبکہ سرحدی علاقوں میں سکیورٹی مزید سخت کیے جانے کا امکان ہے۔
تجزیہ کاروں کے مطابق ایسے واقعات دونوں ممالک کے درمیان پہلے سے موجود کشیدگی میں مزید اضافہ کر سکتے ہیں، خاص طور پر ایسے وقت میں جب خطے میں سیز فائر اور کشیدگی کم کرنے کی کوششیں جاری ہیں۔