افغانستان کے صوبے نورستان میں سرگرم عسکری گروپ نیشنل موبلائزیشن فرنٹ (این ایم ایف) نے دعویٰ کیا ہے کہ اس نے افغان طالبان اور تحریک طالبان پاکستان کے ایک مبینہ مشترکہ اڈے پر حملہ کر کے متعدد جنگجوؤں کو ہلاک اور زخمی کر دیا ہے۔
عسکری گروپ کی جانب سے جاری بیان کے مطابق یہ کارروائی نورستان کے ضلع نورگرام میں 12 اور 13 جولائی کی درمیانی شب کی گئی۔ تقریباً 45 منٹ تک جاری رہنے والی اس جھڑپ میں مبینہ طور پر ٹی ٹی پی کے تین اور افغان طالبان کے دو ارکان سمیت پانچ جنگجو ہلاک جبکہ چار زخمی ہو گئے۔
بیان میں مزید دعویٰ کیا گیا ہے کہ حملے کے بعد دیگر جنگجو موقع سے فرار ہو گئے، جس کے بعد این ایم ایف کے اہلکار اڈے میں داخل ہوئے۔ انہوں نے وہاں موجود اسلحہ اور دیگر عسکری سامان اپنے قبضے میں لینے کے بعد اڈے کو آگ لگا دی اور بغیر کسی جانی نقصان کے واپس لوٹ گئے۔
این ایم ایف کے مطابق قبضے میں لیے گئے اسلحے میں ایم 16 رائفلیں، اے کے طرز کی رائفلیں، ایک ڈریگونوف سنائپر رائفل، پستول اور 22 دستی بم شامل ہیں۔ تاہم، اس عسکری گروپ کے ان تمام دعوؤں اور حملے کی تفصیلات کی آزاد ذرائع سے تاحال تصدیق نہیں ہو سکی ہے۔