نیویارک ٹائمز نے سنسنی خیز دعویٰ کیا ہے کہ ایران کے سابق صدر محمود احمدی نژاد مبینہ طور پر اسرائیل کے ایران میں رجیم چینج منصوبے کا حصہ تھے۔ رپورٹ کے مطابق ان کے اسرائیلی خفیہ ایجنسی موساد کے اعلیٰ حکام سے مسلسل رابطے رہے ہیں۔
امریکی حکام کے حوالے سے دعویٰ کیا گیا ہے کہ اسرائیل کئی برسوں سے ایران میں سیاسی نظام کی تبدیلی کے منصوبے پر کام کر رہا تھا۔ اس منصوبے کے تحت اسرائیل کی کوشش تھی کہ محمود احمدی نژاد کو کسی طرح دوبارہ ایران کا صدر بنوایا جائے۔
رپورٹ کے مطابق موساد کے سربراہ ڈیوڈ برنیا خود اس مہم کی نگرانی کر رہے تھے۔ انہوں نے 2024 میں ہنگری کے دارالحکومت بڈاپسٹ میں موسمیاتی کانفرنس کے دوران احمدی نژاد سے خفیہ ملاقات بھی کی تھی، جس کے اخراجات مبینہ طور پر اسرائیل نے ادا کیے تھے۔
یہ مہم اس وقت عروج پر پہنچی جب فروری میں ایران پر حملوں کے پہلے دن احمدی نژاد کے محافظوں کو نشانہ بنایا گیا تاکہ انہیں نظر بندی سے آزاد کرا کے کسی محفوظ مقام پر منتقل کیا جا سکے، تاہم بعد میں احمدی نژاد اس منصوبے سے مایوس ہو کر الگ ہو گئے۔
نیویارک ٹائمز کے مطابق احمدی نژاد کو آخری بار 6 جولائی کو سابق سپریم لیڈر کے جنازے میں دیکھا گیا تھا۔ خدشہ ظاہر کیا جا رہا ہے کہ اسرائیلی انٹیلیجنس سے مبینہ تعلقات کے الزامات کے بعد وہ اس وقت ایرانی پاسداران انقلاب کی تحویل میں ہیں۔