بلوچستان میں امن و امان کے قیام کے لیے پاک فوج، ایف سی بلوچستان اور پولیس کی جانب سے فتنہ الخوارج کے دہشت گردوں کے خلاف مشترکہ آپریشن شعبان کامیابی سے جاری ہے۔ سکیورٹی ذرائع کے مطابق تازہ کارروائیوں کے دوران مزید 9 خارجی دہشت گردوں کو ہلاک کر دیا گیا ہے۔
سکیورٹی ذرائع کا کہنا ہے کہ دہشت گردوں کو صوبے کے انتہائی دشوار گزار پہاڑی علاقوں اور ان کی خفیہ پناہ گاہوں میں نشانہ بنایا گیا۔ ان کارروائیوں میں پاک فوج اور قانون نافذ کرنے والے اداروں نے فضائی اور زمینی طاقت دونوں کا استعمال کیا۔
سرکاری اعداد و شمار کے مطابق آپریشن شعبان کے باقاعدہ آغاز سے اب تک صرف اس مہم میں ہلاک ہونے والے دہشت گردوں کی تعداد 52 ہو چکی ہے۔ تاہم 5 جولائی سے شروع ہونے والے آپریشن اور اس کے ساتھ منسلک دیگر انٹیلیجنس بیسڈ کارروائیوں کے نتیجے میں اب تک مجموعی طور پر 88 خارجی دہشت گرد مارے جا چکے ہیں۔
سکیورٹی حکام نے اپنے عزم کا اعادہ کرتے ہوئے واضح کیا ہے کہ صوبے میں شرپسند عناصر کے خلاف گھیرا تنگ کر دیا گیا ہے۔ بلوچستان کی سرزمین سے آخری دہشت گرد کے مکمل خاتمے اور پائیدار امن کی بحالی تک آپریشن شعبان بغیر کسی تعطل کے مسلسل جاری رہے گا۔
دیکھیے: بھارت: کاکروچ احتجاج میں پیلٹ گن استعمال کے شواہد سامنے آگئے، برطانوی میڈیا
