بلوچستان میں سکیورٹی فورسز نے ایک بڑی کارروائی کرتے ہوئے فتنۃ الہندوستان کے 19 دہشت گردوں کو ہلاک کر دیا ہے۔ اس شدید فائرنگ کے تبادلے میں سکیورٹی فورسز کے 11 بہادر جوانوں نے بھی جامِ شہادت نوش کیا۔
سکیورٹی ذرائع کے مطابق مصدقہ اطلاعات کی بنیاد پر فورسز نے قومی شاہراہ این-25 پر جھاو کراس اور کرارو کے درمیان انٹیلی جنس بیسڈ آپریشن کیا۔ اس مقام پر فتنۃ الہندوستان کے مسلح دہشت گرد سڑک بلاک کر کے مسافروں اور مقامی شہریوں سے زبردستی بھتہ وصول کرنے میں مصروف تھے۔
سکیورٹی فورسز نے موقع پر پہنچ کر بروقت اور مؤثر کارروائی کی، جس کے نتیجے میں بھتہ خوری اور شرپسندی میں ملوث 19 دہشت گرد مارے گئے اور متعدد زخمی ہو گئے۔ آپریشن کے دوران دہشت گردوں کی فائرنگ کا بہادری سے مقابلہ کرتے ہوئے سکیورٹی فورسز کے 11 سپوتوں نے جامِ شہادت نوش کیا۔
سکیورٹی ذرائع کا کہنا ہے کہ فورسز کی یہ بروقت اور سخت کارروائی اس عزم کا واضح اظہار ہے کہ عوام کی جان و مال اور شاہراہوں کے تحفظ پر کوئی سمجھوتہ نہیں کیا جائے گا، اور بلوچستان کے امن کو یرغمال بنانے کی ہر کوشش کا بھرپور جواب دیا جاتا رہے گا۔
دیکھیے: پاکستان کی کامیاب ترین کارروائیاں، ٹی ٹی پی اور بی ایل اے مشترکہ پناہ گاہوں پر مجبور