خیبر پختونخوا کے ضلع بنوں میں سکیورٹی فورسز اور بم ڈسپوزل اسکواڈ (بی ڈی ایس) نے بروقت کارروائی کرتے ہوئے دہشت گردی کی ایک بڑی کوشش کو ناکام بنا دیا ہے۔
ذرائع کے مطابق ماندان چوک کے قریب ایک مشکوک موٹر سائیکل کھڑی دیکھی گئی، جس کی تلاشی لینے پر اس میں نصب بم اور بارودی مواد برآمد ہوا۔
اطلاع ملتے ہی پولیس اور سکیورٹی فورسز نے علاقے کی ناکہ بندی کر کے عام رفت و آمد معطل کر دی اور بم ڈسپوزل اسکواڈ کو طلب کر لیا۔
بی ڈی ایس کی ٹیم نے جب بارودی مواد کو ناکارہ بنانے کا عمل شروع کیا تو اس دوران بم کا ایک حصہ جزوی دھماکے سے پھٹ گیا۔
حکام کے مطابق بی ڈی ایس اہلکاروں کی پیشہ ورانہ مہارت اور پیشگی احتیاطی تدابیر کی وجہ سے واقعہ میں کوئی جانی یا مالی نقصان نہیں ہوا۔
سکیورٹی اداروں نے شواہد اکٹھے کر کے واقعے کی تفصیلی تحقیقات شروع کر دی ہیں، جبکہ علاقے میں سرچ آپریشن بھی جاری ہے۔
دیکھیے: بنوں: پولیس امن کمیٹی پر شہری کے اغوا اور قتل کا الزام، ورثا کا شدید احتجاج
