پندرہ جولائی سے برطانیہ نے پاکستانی شہریوں کیلئے ای ویزا سہولت متعارف کرا دی
برطانیہ نے 15 جولائی 2025 سے پاکستانی شہریوں کے لیے ایک نئی اور اہم سہولت کا آغاز کیا ہے۔ اب پاکستان سے برطانیہ میں ایک سال سے کم مدت کے لیے تعلیم یا ملازمت کے سلسلے میں جانے والے افراد مکمل طور پر آن لائن ای ویزا کے لیے درخواست دے سکتے ہیں۔ اس نظام کے تحت پاسپورٹ جمع کرانے یا ویزا سنٹر جانے کی ضرورت ختم ہو گئی ہے۔
برطانوی ہوم آفس کے مطابق نیا ای ویزا سسٹم نہ صرف ویزا پراسیسنگ کو جدید اور تیز تر بنائے گا بلکہ سیکیورٹی اور شفافیت میں بھی اضافہ کرے گا۔ اب تمام شارٹ ٹرم ویزے براہ راست درخواست گزار کے یو کے وی آئی اکاؤنٹ سے منسلک ہوں گے جس سے ایئرپورٹ پر وقت کی بچت اور کاغذی کاروائی سے نجات مل جائے گی۔
طلبہ کے لیے یہ سہولت خاص طور پر فائدہ مند ثابت ہو گی جو اب اسکالرشپ، فیلوشپ یا بین الاقوامی کانفرنسوں کے لیے بروقت درخواست دے سکتے ہیں۔ ڈیجیٹل ویزا بطور ثبوت صرف اپلوڈ کرنا ہوگا جس سے عالمی مواقع کے مزید دروازے کھلیں گے۔
اس نئی پیش رفت کے ذریعے برطانیہ نے پاکستان کے لیے مختصر مدتی ویزوں کے عمل کو مکمل طور پر ڈیجیٹل بنا دیا ہے جو کہ صارفین کے تجربے میں بہتری اور رسائی میں آسانی کی علامت ہے۔
دیکھیں: افغان حکومت کا ٹی ٹی پی کو غیر مسلح کرنے اور مختلف شہروں میں بسانے کا فیصلہ