افغانستان کی معروف خاتون سیاستدان اور سابق پارلیمانی رکن فوزیہ کوفی نے طالبان حکومت کی جانب سے لڑکیوں پر عائد تعلیمی پابندیوں کے خلاف سخت مؤقف اختیار کرتے ہوئے اس کے خلاف جدوجہد کو ایک مقدس جدوجہد قرار دیا ہے۔
امو ٹی وی کے مطابق فوزیہ کوفی نے سابق سیاسی رہنماء خیرمحمد خیرخواہ کی برسی کے موقع پر منعقدہ ایک تقریب سے خطاب کرتے ہوئے طالبان حکومت کی تعلیمی پالیسیوں پر براہ راست تنقید کی۔ ان کا کہنا تھا کہ آج افغانستان کی بیٹیوں کو ان کے بنیادی حق سے محروم رکھا جا رہا ہے، جو نہ صرف ان کے مستقبل بلکہ پورے ملک کی ترقی اور خودمختاری کے خلاف ہے۔
انہوں نے ان بیانیوں پر بھی سخت ردعمل ظاہر کیا جو ملک میں امن، تعلیم اور مزاحمت کی علامت شخصیات کو ناحق جنگجو سردار قرار دیتے ہیں۔ فوزیہ کوفی کے مطابق یہ سراسر ناانصافی ہے کہ ان شخصیات کو جنگجو کہا جائے جنہوں نے ہمیشہ قلم اور علم کے ذریعے قوم کی خدمت کی اور استقامت و حب الوطنی کی مثال قائم کی۔
تعلیمی بحران کی گہرائی
فوزیہ کوفی کا یہ بیان ایسے وقت میں سامنے آیا ہے جب افغانستان میں لڑکیوں کی تعلیم پر پابندی کا بحران شدت اختیار کر چکا ہے، جس کے نتیجے میں ایک پوری نسل کا مستقبل خطرے میں ہے۔ تین ملین سے زائد لڑکیاں اور نوجوان خواتین اسکول اور جامعات سے محروم ہیں، جسے ماہرین تعلیمی نسل کشی سے تعبیر کر رہے ہیں۔
ماہرین کے مطابق خواتین کی تعلیم پر پابندی کے باعث معیشت کو ناقابل تلافی نقصان پہنچ رہا ہے۔ عالمی بینک کے اندازوں کے مطابق خواتین کی معاشی شرکت محدود ہونے سے افغانستان کی مجموعی قومی پیداوار میں نمایاں کمی کا خدشہ ہے، جبکہ ہزاروں خاندان بے روزگاری اور غربت کا شکار ہو چکے ہیں۔
دیکھیں: افغان نائب گورنر کے بیٹے سمیت دو بچے اغواء، ریسکیو آپریشن کے بعد رہا