امریکی فیڈرل بیورو آف انویسٹی گیشن (ایف بی آئی) نے ایک بھارتی شہری کو قتل، فراڈ اور دیگر جرائم کے الزامات کے تحت گرفتار کر لیا ہے۔ ملزم کی شناخت نتیش کوشل کے نام سے کی گئی ہے، جسے امریکی ریاست ورمونٹ سے گرفتار کیا گیا۔
امریکی حکام کے مطابق ملزم جگو بھگوانپوریا نامی منظم مجرمانہ نیٹ ورک سے وابستہ تھا۔ نتیش کوشل پر قتل، اغوا، منشیات اسمگلنگ، بھتہ خوری، اسلحہ اسمگلنگ، منی لانڈرنگ اور انسانی اسمگلنگ سمیت متعدد سنگین الزامات عائد ہیں۔
اس پر وفاقی سطح پر منظم جرائم کے انسداد کے تحت مقدمہ درج کیا گیا ہے۔ واضح رہے کہ نتیش کوشل کو چند روز قبل ہی ایف بی آئی کی مطلوب ترین مجرموں کی فہرست میں شامل کیا گیا تھا۔
ایف بی آئی نے بتایا کہ گرفتاری مختلف قانون نافذ کرنے والے اداروں کے مشترکہ تعاون اور تحقیقات سے عمل میں آئی۔ استغاثہ کے مطابق ملزم کو عدالت میں پیش کیا گیا، جہاں اسے عائد الزامات سے آگاہ کیا گیا۔
اگر الزامات میں سزا ہوتی ہے تو ملزم کو امریکی قانون کے تحت طویل قید سمیت سخت سزاؤں کا سامنا کرنا پڑ سکتا ہے۔ ایف بی آئی نے کیس کے تمام شواہد یا تفتیشی تفصیلات فوری طور پر عوامی سطح پر جاری نہیں کیں، کیونکہ تحقیقات ابھی جاری ہیں۔
حکام یہ بھی جانچ رہے ہیں کہ آیا اس کیس میں مزید افراد یا کسی وسیع تر بین الاقوامی مجرمانہ نیٹ ورک کا بھی کردار موجود ہے۔