بلوچستان کے سرحدی علاقے مند میں ایک افسوسناک واقعہ پیش آیا جہاں پاک فوج کے پانچ جوان وطن پر قربان ہوگئے۔ حکام کے مطابق جوان معمول کے آپریشنل فرائض سرانجام دے رہے تھے کہ اچانک ان کا قافلہ بارودی سرنگ سے ٹکرا گیا۔
آئی ایس پی آر کے بیان کے مطابق شہداء میں کیپٹن وقار احمد کاکڑ (142 ایل سی، سابق 47 کیولری)، نائیک جنید، نائیک عصمت، لانس نائیک خان محمد اور سپاہی ظہور شامل ہیں۔
ترجمان کے مطابق فوجی جوان دہشت گردی کے خلاف برسرپیکار تھے اور اپنی جانوں کا نذرانہ دے کر ملک میں امن قائم رکھنے کی جدوجہد میں عظیم قربانی پیش کی۔
یاد رہے کہ بلوچستان میں حالیہ دنوں میں دہشت گردوں کی کارروائیوں میں اضافہ ہوا ہے، تاہم سیکیورٹی فورسز ان کے مکمل خاتمے کے لیے پرعزم ہیں۔ فوجی حکام نے اس عزم کا اعادہ کیا ہے کہ دہشت گردوں اور ان کے سہولت کاروں کو ہر صورت انجام تک پہنچایا جائے گا۔
قومی سطح پر شہداء کی قربانیوں کو خراجِ تحسین پیش کیا جا رہا ہے اور عوام نے ان کے اہل خانہ کے ساتھ یکجہتی کا اظہار کیا ہے۔
دیکھیں: خیبرپختونخوا میں آپریشن جاری؛ مزید 31 ٹی ٹی پی دہشت گرد ہلاک