سپریم کورٹ کے رجسٹرار آفس نے بانی پی ٹی آئی عمران خان کو شفا انٹرنیشنل ہسپتال منتقل کرنے کے عدالتی حکم کے خلاف حکومتی نظرثانی درخواست پر اعتراض عائد کرتے ہوئے واپس کر دی۔
حکومتی مؤقف
حکومت نے 19 اگست کو سپریم کورٹ کے 18 اگست کے حکم پر نظرثانی کے لیے درخواست دائر کی تھی، جس میں عمران خان کو نجی ہسپتال منتقل کرنے کے فیصلے کو واپس لینے کی استدعا کی گئی تھی۔ درخواست میں مؤقف اختیار کیا گیا تھا کہ قیدی کو جیل سے ہسپتال منتقل کرنے کے لیے قانونی طریقہ کار پہلے سے موجود ہے اور عدالتی حکم اس طریقہ کار سے تجاوز کرتا ہے۔
ذرائع کے مطابق رجسٹرار آفس نے درخواست کے ساتھ پیپر بکس مکمل نہ ہونے پر اعتراض عائد کیا ہے۔ حکومتی قانونی ٹیم اعتراضات دور کر کے درخواست دوبارہ دائر کرنے کی تیاری کر رہی ہے۔
واضح رہے کہ سپریم کورٹ نے 18 اگست کو عمران خان کو علاج اور طبی معائنے کے لیے دو روز کے اندر شفا انٹرنیشنل ہسپتال منتقل کرنے کا حکم دیا تھا۔ عدالت نے ماہرین پر مشتمل میڈیکل بورڈ کے ذریعے ان کے علاج اور طبی معائنے کی ہدایت بھی کی تھی۔
دیکھیے: عمران خان کی ہسپتال منتقلی: حکومت نے نظرِ ثانی درخواست دائر کر دی
