نائب وزیراعظم و وزیر خارجہ سینیٹر محمد اسحاق ڈار اپنے وفد کے ہمراہ 16 سے 17 جولائی 2026 تک کے سرکاری دورے پر چین کے شہر شنگھائی پہنچ گئے ہیں۔
ذرائع کے مطابق دورے کے دوران وہ ورلڈ آرٹیفیشل انٹیلی جنس کوآپریشن آرگنائزیشن کے قیام کے معاہدے پر دستخط کی تقریب میں شرکت کریں گے۔
نائب وزیراعظم پاکستان کے بانی رکن کی حیثیت سے اس معاہدے پر دستخط کریں گے۔ اسحاق ڈار 17 جولائی کو 2026 ورلڈ اے آئی کانفرنس کی افتتاحی تقریب میں بھی شرکت کریں گے۔ اس کے علاوہ وہ اپنے ہم منصبوں کے ساتھ دوطرفہ ملاقاتیں بھی کریں گے۔
شنگھائی پہنچنے پر ہوائی اڈے پر ان کا استقبال شنگھائی میونسپل پارٹی کمیٹی کی قائمہ کمیٹی کے رکن اور نائب میئر وو وی، چین میں پاکستان کے ناظم الامور اعزاز خان، اور شنگھائی میں پاکستان کے قونصل جنرل شہزاد احمد خان نے کیا۔
