لکی مروت: خیبر پختونخوا کے ضلع لکی مروت کی تحصیل سرائے نورنگ میں جمعیت علمائے اسلام (ف) کے رہنما مولانا خالد امین کو نامعلوم مسلح افراد نے فائرنگ کر کے قتل کر دیا۔
پولیس ذرائع کے مطابق واقعہ نالی چک کے علاقے میں پیش آیا جہاں موٹر سائیکل سوار حملہ آور نے مولانا خالد امین کو نشانہ بنایا اور فرار ہو گیا۔ واقعے کے بعد علاقے میں خوف و ہراس پھیل گیا جبکہ پولیس نے جائے وقوعہ کو گھیرے میں لے کر تحقیقات شروع کر دی ہیں۔
ذرائع کے مطابق مولانا خالد امین جے یو آئی (ف) کے مقامی رہنما تھے اور ماضی میں شدت پسند گروہوں کے خلاف مؤقف رکھنے کے باعث نشانے پر تھے۔ اطلاعات ہیں کہ وہ کالعدم تنظیم داعش خراسان اور تحریک طالبان پاکستان (ٹی ٹی پی) کے ممکنہ ہدف پر بھی تھے۔
تاحال حملے کی ذمہ داری کسی گروپ کی جانب سے قبول نہیں کی گئی، تاہم سیکیورٹی ادارے مختلف پہلوؤں سے واقعے کی تحقیقات کر رہے ہیں۔
حکام کا کہنا ہے کہ ملزمان کی گرفتاری کیلئے علاقے میں سرچ آپریشن بھی شروع کر دیا گیا ہے۔
