کراچی: صوبائی دارالحکومت کراچی میں پاکستان رینجرز سندھ کے کیمپ پر دہشتگردوں کا حملہ ناکام بنا دیا گیا ہے، جس کے نتیجے میں 3 دہشتگرد ہلاک اور ایک زخمی افغان دہشتگرد کو گرفتار کر لیا گیا ہے۔ فائرنگ کے شدید تبادلے میں رینجرز کے 3 جوانوں نے جامِ شہادت نوش کیا جبکہ 4 اہلکار زخمی ہوئے۔
آئی ایس پی آر کے مطابق بھارتی سرپرستی میں سرگرمِ عمل کالعدم جماعت الاحرار کے خوارج نے رینجرز کیمپ کے مرکزی گیٹ پر دھماکے کے بعد اندر داخل ہونے کی کوشش کی۔ وہاں تعینات رینجرز کے مستعد جوانوں نے فوری اور مؤثر جوابی کاروائی کرتے ہوئے حملہ آوروں کو مصروف کیا۔
اس دوران سکیورٹی فورسز کی فائرنگ سے 3 خوارج مارے گئے جبکہ ایک افغان دہشتگرد کو زخمی حالت میں گرفتار کر لیا گیا۔ آئی ایس پی آر کا کہنا ہے کہ علاقے میں کلیئرنس آپریشن شروع کر دیا گیا ہے۔
جنرل سید عاصم منیر نے رینجرز کیمپ پر حملہ ناکام بنانے والے بہادر شہدا کو زبردست خراجِ عقیدت پیش کیا اور لواحقین سے دلی تعزیت کا اظہار کیا۔ آرمی چیف نے عزم کا اعادہ کیا کہ قوم کی حفاظت کے لیے یہ قربانیاں ہمارے حوصلے کو مزید مضبوط بناتی ہیں اور پاکستان اپنے جوانوں کے خون کا بدلہ لینے کے لیے حملے کے ذمہ داروں کے خلاف بھرپور کارروائی کرے گا۔
انہوں نے واضح کیا کہ عزمِ استحکام وژن کے تحت ملک سے دہشتگردی کے مکمل خاتمے تک آپریشنز جاری رہیں گے۔
دوسری جانب صدرِ مملکت آصف علی زرداری نے بھی رینجرز کیمپ پر حملے کی شدید مذمت کرتے ہوئے شہدا کی قربانیوں کو سراہا ہے۔
صدر زرداری نے کہا کہ بیرونی سرپرستی میں سرگرم دہشتگرد عناصر کے مذموم عزائم کبھی کامیاب نہیں ہوں گے اور پوری قوم دہشتگردی کے خلاف جنگ میں اپنی سکیورٹی فورسز اور قانون نافذ کرنے والے اداروں کے شانہ بشانہ کھڑی ہے۔
دیکھیے: بھارت: کاکروچ احتجاج میں پیلٹ گن استعمال کے شواہد سامنے آگئے، برطانوی میڈیا