ضلع کرک اور کوہاٹ کی سرحد پر سکیورٹی فورسز اور پولیس نے مشترکہ انٹیلی جنس بیسڈ آپریشن کرتے ہوئے کالعدم تنظیم کے 4 خطرناک دہشت گردوں کو ہلاک کر دیا ہے۔
خیبرپختونخوا پولیس کے مطابق خٹک ڈیم کے قریبی علاقے میں دہشت گردوں کی موجودگی کی خفیہ اطلاع پر سکیورٹی فورسز، کرک اور کوہاٹ پولیس نے مشترکہ کارروائی کا آغاز کیا۔ آپریشن کے دوران وہاں چھپے شرپسندوں نے سکیورٹی اہلکاروں پر اندھا دھند فائرنگ کر دی۔
سکیورٹی فورسز اور پولیس کی جانب سے کی گئی مؤثر اور بھرپور جوابی کارروائی کے نتیجے میں کالعدم تنظیم کے کمانڈر زاہد گروپ سے تعلق رکھنے والے 4 دہشت گرد موقع پر ہی ہلاک ہو گئے۔
حکام کا کہنا ہے کہ ہلاک ہونے والے دہشت گرد سکیورٹی فورسز اور پولیس پر متعدد سنگین حملوں میں مطلوب تھے۔ یہ عناصر سال 2025 میں ضلع کرک کے تھانہ بانڈہ کے ایس ایچ او عمر نواز اور ضلع کوہاٹ کے انسپکٹر طاہر نواز کی شہادت، جبکہ رواں سال میں ڈی ایس پی اسد محمود اور سب انسپکٹر انور گل سمیت دیگر پولیس افسران کی شہادت کے مقدمات میں نامزد تھے۔
کامیاب آپریشن کے بعد سکیورٹی فورسز اور پولیس کی بھاری نفری نے پورے علاقے کا محاصرہ کر کے وسیع پیمانے پر سرچ آپریشن شروع کر دیا ہے، جبکہ ہلاک ہونے والے دہشت گردوں کی باقاعدہ شناخت کا عمل بھی جاری ہے۔
سکیورٹی حکام نے علاقے میں پائیدار امن کے قیام اور دہشت گردی کے مکمل خاتمے کے عزم کا اعادہ کرتے ہوئے واضح کیا ہے کہ شرپسند عناصر کے خلاف کارروائیاں پوری قوت کے ساتھ جاری رکھی جائیں گی۔