خیرپور کے علاقے کوٹ لالو میں پولیس اور ڈاکوؤں کے درمیان ہونے والے پولیس مقابلے میں تین مطلوب ڈاکو ہلاک ہو گئے ہیں، جن میں سے ایک کے سر کی قیمت 30 لاکھ روپے تھی۔ ایس ایس پی سمیع اللہ نے تصدیق کی ہے کہ ہلاک شدگان میں خطرناک ڈاکو عاقب علی عرف عاقو بھی شامل ہے، جو قتل، ڈکیتی اور دیگر سنگین جرائم میں مطلوب تھا اور اس پر سرکاری انعام کا اعلان کیا گیا تھا۔
ایس ایس پی سمیع اللہ کے مطابق پولیس کو موصول ہونے والی خفیہ معلومات کی بنیاد پر کوٹ لالو کے علاقے میں ایک خصوصی آپریشن کیا گیا، جہاں یہ ڈاکو چھپے ہوئے تھے۔ کاروائی کے دوران دونوں اطراف سے فائرنگ کا تبادلہ ہوا، جس کے نتیجے میں تینوں مطلوب ملزمان موقع پر ہی ہلاک ہو گئے۔ پولیس نے مقابلے کے بعد موقع سے اسلحہ اور گولیاں بھی برآمد کی ہیں۔
ایس ایس پی نے تفصیلات بتاتے ہوئے کہا کہ ہلاک شدہ ڈاکو عاقب علی عرف عاقو سندھ میں ایک خوفناک مجرم کے طور پر جانا جاتا تھا اور اس کے خلاف قتل، ڈکیتی، اغوا برائے تاوان اور دیگر متعدد مقدمات درج تھے۔ باقی ہلاک شدگان بھی اسی طرح کے سنگین جرائم میں ملوث تھے۔ پولیس کے مطابق، یہ کارروائی ضلع میں جرائم کی روک تھام اور عوام کے تحفظ کے لیے کی گئی تھی۔
مقامی لوگوں نے پولیس کی اس کاروائی کو خیرپور کے امن و امان کے لیے ایک اہم کامیابی قرار دیا ہے۔ ان کا کہنا ہے کہ ان ڈاکوؤں کے خوف سے علاقے کے رہائشیوں کی زندگیاں متاثر ہو رہی تھیں۔ پولیس نے علاقے میں مزید چھاپے مارے ہیں اور ممکنہ ساتھیوں کی تلاش جاری ہے۔
دیکھیے: وادی تیراہ میں آپریشن پر منظور پشتین کے الزامات؛ سکیورٹی ماہرین نے اپنا مؤقف جاری کر دیا