خیبر کے علاقے جمرود میں نامعلوم مسلح افراد نے دو الگ الگ واقعات میں فائرنگ کر کے دو پولیس اہلکاروں کو قتل کر دیا۔ ان واقعات کے بعد علاقے میں خوف و ہراس پھیل گیا اور پولیس نے واقعے کی تحقیقات شروع کر دی ہیں۔
اطلاعات کے مطابق فائرنگ کا پہلا واقعہ شاہ کس میں پیش آیا جہاں پولیس اہلکار کامران کو نشانہ بنایا گیا۔ دوسرا واقعہ گنڈی ملاک شگہ میں پیش آیا جہاں مسلح افراد نے فائرنگ کر کے بہادر خان نامی اہلکار کی جان لے لی۔
واقعات کی اطلاع ملتے ہی پولیس اور سکیورٹی فورسز نے موقع پر پہنچ کر لاشوں کو تحویل میں لیا اور ہسپتال منتقل کیا۔ سکیورٹی فورسز نے دونوں علاقوں کو گھیرے میں لے کر سرچ آپریشن شروع کر دیا ہے، تاہم ابھی تک کسی گرفتاری کی اطلاع نہیں ملی۔
خیبر پختونخوا میں سکیورٹی اہلکاروں پر حملوں کے واقعات میں مسلسل اضافہ دیکھنے میں آ رہا ہے۔ اس سے قبل کرک میں بھی مسلح افراد کی فائرنگ سے ایس ایچ او کو قتل کر دیا گیا تھا، جس کے بعد صوبے بھر میں سکیورٹی فورسز کی جانب سے الرٹ جاری کیا گیا ہے۔