رات گئے لکی مروت کے علاقے شاہ طورہ میں واقع پولیس چوکی پر فتنۃ الخوارج نے حملہ کیا، تاہم پولیس کے بروقت ردعمل نے اس حملے کو ناکام بنا دیا۔ ذرائع کے مطابق تقریباً 15 فتنۃ الخوارج کے مسلح افراد نے پولیس چوکی پر فائرنگ کرتے ہوئے حملہ کیا۔ پولیس نے تھرمل کیمروں کے ذریعے مشکوک حرکات کا پتہ چلانے کے بعد فوری طور پر جوابی کارروائی کی۔
پولیس جوانوں کی جوابی فائرنگ کے نتیجے میں حملہ آوروں کو فرار ہونا پڑا۔ اس واقعے میں پولیس کے کسی فرد کے جانی نقصان کی اطلاع نہیں ہے۔ آرپی او بنوں ریجن سجاد خان نے پولیس جوانوں کی کارکردگی کو سراہتے ہوئے کہا کہ لکی مروت پولیس ہر قسم کے خطرات سے نمٹنے کے لیے تیار ہے۔
ڈسٹرکٹ پولیس آفیسر لکی مروت نزیر خان نے پولیس کی پیشہ ورانہ صلاحیتوں اور بروقت ردعمل کو سراہا۔ انہوں نے کہا کہ امن دشمن عناصر کے خلاف پوری قوت سے کارروائی جاری رہے گی اور عوام کے جان و مال کے تحفظ پر کوئی سمجھوتہ نہیں کیا جائے گا۔
اس واقعے کے بعد علاقے میں سکیورٹی کے اضافی اقدامات کیے گئے ہیں اور فرار ہونے والے حملہ آوروں کی تلاش جاری ہے۔
دیکھیں: خیبرپختونخوا بدامنی کی لپیٹ میں، دہشتگرد بے لگام؛ وزیراعلیٰ کے صوبے سے باہر دورے