اسلام آباد: لبنان کے وزیراعظم نواف سلام نے لبنان اور اس کے عوام پر جاری حملوں کے فوری خاتمے کیلئے پاکستان سے تعاون کی درخواست کی ہے، جب کہ وزیراعظم شہباز شریف نے اسرائیلی کارروائیوں کی شدید مذمت کرتے ہوئے جانی نقصان پر افسوس کا اظہار کیا ہے۔
وزیراعظم آفس کے مطابق وزیراعظم شہباز شریف اور لبنانی وزیراعظم کے درمیان ٹیلیفونک رابطہ ہوا جس میں خطے کی صورتحال اور لبنان میں جاری کشیدگی پر تبادلہ خیال کیا گیا۔
اعلامیے کے مطابق وزیراعظم شہباز شریف نے لبنان کے خلاف اسرائیلی حملوں کی شدید مذمت کی اور ہزاروں قیمتی جانوں کے ضیاع پر دکھ کا اظہار کیا۔ انہوں نے کہا کہ پاکستان خطے میں امن کے قیام کے لیے مخلصانہ کوششیں جاری رکھے ہوئے ہے۔
حکام کے مطابق لبنانی وزیراعظم نواف سلام نے پاکستان کی سفارتی کوششوں کو سراہتے ہوئے لبنان پر حملوں کے فوری خاتمے کیلئے تعاون طلب کیا اور دونوں رہنماؤں نے رابطے میں رہنے پر اتفاق کیا۔
غیر ملکی خبررساں ایجنسی کے مطابق لبنانی وزیراعظم نے پاکستان سے یہ بھی درخواست کی کہ ایران امریکا جنگ بندی میں لبنان کی شمولیت کی تصدیق کی جائے تاکہ مزید حملوں کو روکا جا سکے۔
میڈیا رپورٹس کے مطابق یہ پیش رفت ایسے وقت میں سامنے آئی ہے جب حالیہ اسرائیلی حملوں میں لبنان میں 200 سے زائد افراد جاں بحق ہو چکے ہیں، جبکہ امریکا اور اسرائیل کا کہنا ہے کہ جنگ بندی میں لبنان شامل نہیں۔
ادھر ایران کے اسپیکر پارلیمنٹ نے مؤقف اختیار کیا ہے کہ ایران لبنان کو جنگ بندی کا لازمی حصہ سمجھتا ہے، جبکہ اسرائیل نے حزب اللہ کے خلاف کارروائیاں جاری رکھنے کا اعلان کیا ہے۔