پاکستان میں سعودی عرب کے نوتعینات سفیر ڈاکٹر راجح طامی البقمی نے چیف آف آرمی اسٹاف فیلڈ مارشل سید عاصم منیر سے جنرل ہیڈکوارٹرز (جی ایچ کیو) راولپنڈی میں ملاقات کی۔ اس دوران دونوں ممالک کے باہمی تعلقات اور علاقائی سلامتی کی صورتحال پر گفتگو ہوئی۔
آئی ایس پی آر کے مطابق ملاقات میں مکہ مشترکہ دفاعی معاہدے کے تحت ہونے والی پیشرفت پر اطمینان کا اظہار کیا گیا۔ دونوں شخصیات نے پاکستان اور سعودی عرب کے درمیان دفاعی تعاون مزید مضبوط بنانے کی اہمیت پر بھی زور دیا۔
ملاقات میں دونوں ممالک کے درمیان ادارہ جاتی روابط بڑھانے اور تزویراتی سطح پر رابطہ کاری بہتر بنانے پر بھی تبادلہ خیال کیا گیا۔
آئی ایس پی آر کے مطابق فیلڈ مارشل عاصم منیر نے ڈاکٹر راجح طامی البقمی کو پاکستان میں سعودی سفیر مقرر ہونے پر مبارکباد دی۔ انہوں نے امید ظاہر کی کہ نئی تعیناتی سے دونوں ممالک کے دیرینہ تعلقات مزید مستحکم ہوں گے۔
فیلڈ مارشل عاصم منیر نے کہا کہ پاکستان اور سعودی عرب کے تعلقات مشترکہ مذہبی عقیدے، باہمی اعتماد اور تزویراتی شراکت داری پر قائم ہیں۔
انہوں نے اس اعتماد کا اظہار کیا کہ سعودی سفیر کی تعیناتی دونوں ممالک کے درمیان برادرانہ تعلقات اور مختلف شعبوں میں تعاون کو مزید فروغ دینے میں اہم کردار ادا کرے گی۔
