خیبر پختونخوا کے ضلع اورکزئی کی سنٹرل تحصیل کے علاقے سنگھڑا میں مقامی امن کمیٹی اور فتنۃ الخوارج کے ذیلی گروہ لشکرِ اسلام کے درمیان شدید فائرنگ کا تبادلہ ہوا ہے۔ یہ جھڑپ کمانڈر محمد دین کے زیرِ کمان سرگرم خارجی گروہ کے ساتھ پیش آئی۔
ابتدائی اطلاعات کے مطابق امن کمیٹی نے دہشت گردوں کی نقل و حرکت کی اطلاع ملتے ہی مؤثر حکمتِ عملی کے تحت ان کے راستے پر گھات لگائی۔ اس بروقت کارروائی کے نتیجے میں 2 خارجی دہشت گرد موقع پر ہی ہلاک ہو گئے جبکہ متعدد شدید زخمی ہوئے۔
واقعے کی اطلاع ملتے ہی سکیورٹی فورسز کی بھاری نفری نے علاقے کو گھیرے میں لے کر وسیع پیمانے پر سرچ اور کلیئرنس آپریشن شروع کر دیا ہے۔ فورسز نے فرار ہونے والے زخمی دہشت گردوں کی گرفتاری کے لیے تمام ممکنہ راستوں کی ناکہ بندی کر دی ہے۔
علاقے میں مقامی آبادی اور سکیورٹی فورسز کے درمیان مکمل ہم آہنگی دیکھی جا رہی ہے۔ غیور مقامی عوام نے امن کمیٹی کا ساتھ دیتے ہوئے ایک بار پھر واضح کر دیا ہے کہ وہ اپنے خطے میں امن دشمن عناصر اور دہشت گردوں کو کسی صورت سر اٹھانے کی اجازت نہیں دیں گے۔
دیکھیے: وزیرستان میں انٹیلی جنس بیسڈ آپریشن، فتنہ الخوارج کے 3 دہشت گرد ہلاک
