وفاقی وزیرِ قانون و انصاف سینیٹر اعظم نذیر تارڑ سے بنگلہ دیشی ہائی کمشنر محمد اقبال حسین نے ملاقات کی، جس میں پاک-بنگلہ دیش تعلقات، قانونی اصلاحات اور نظامِ انصاف کی ڈیجیٹلائزیشن سمیت باہمی دلچسپی کے امور پر تبادلہ خیال کیا گیا۔ ملاقات میں دونوں جانب سے دوطرفہ روابط مزید مضبوط بنانے پر بھی اتفاق کیا گیا۔
وفاقی وزیرِ قانون نے کہا کہ قانون و انصاف سمیت مختلف شعبوں میں پاکستان اور بنگلہ دیش کے درمیان تعاون کے وسیع امکانات موجود ہیں۔ انہوں نے کہا کہ پاکستان قانونی اصلاحات اور نظامِ انصاف کی ڈیجیٹلائزیشن میں بنگلہ دیش کے ساتھ اپنے تجربات شیئر کرنے کے لیے تیار ہے۔
بنگلہ دیشی ہائی کمشنر محمد اقبال حسین نے بنگلہ دیشی ججز کی آئی ایم اے سی میں تربیت پر پاکستان کا شکریہ ادا کیا۔ انہوں نے پاکستان کے ثالثی و مصالحتی نظام کے تجربات سے استفادہ کرنے میں بنگلہ دیش کی دلچسپی کا اظہار کرتے ہوئے اس شعبے میں مزید تعاون کی خواہش ظاہر کی۔
دونوں اطراف نے اس امر پر بھی اتفاق کیا کہ عوامی اور ادارہ جاتی روابط میں اضافہ پاک-بنگلہ دیش تعلقات کے لیے خوش آئند ہے۔