پاکستان کے چیئرمین جوائنٹ چیفس آف اسٹاف کمیٹی جنرل ساحر شمشاد مرزا اس وقت بنگلادیش کے دورے پر ہیں۔
جہاں انہوں نے بنگلادیش کی فضائیہ اور بحریہ کے سربراہان سے انفرادی ملاقاتیں کیں ہیں جن میں دفاعی شراکت داری اور خطے کی امن و سلامتی پر تفصیلی تبادلۂ خیال کیا گیا۔
بنگلادیش کے دورے کے دوران جنرل ساحر شمشاد کی بنگلادیش کے چیف ایڈوائزر پروفیسر محمد یونس سے بھی ملاقات ہوٗی۔ ملاقات میں دونوں رہنماؤں نے تجارت، سرمایہ کاری اور دفاعی شعبوں میں باہمی تعاون کو فروغ دینے پر تفصیلی گفتگو کی۔
دوران ملاقات پاکستان اور بنگلادیش کے تاریخی و ثقافتی تعلقات کو مزید مضبوط بنانے پر غور کیا گیا۔ جنرل ساحر شمشاد مرزا نے کہا کہ پاکستان خطے میں ترقی و استحکام کے لیے بنگلادیش کے ساتھ چلنے کا عزم رکھتا ہے۔
انہوں نے بتایا کہ کراچی اور چٹاگانگ کے درمیان بحری راستہ پہلے ہی فعال ہو چکا ہے جبکہ ڈھاکا۔ کراچی فضائی رابطہ بھی آئندہ چند ماہ میں بحال کیا جائے گا۔ انکا کہنا تھا یہ اقدامات نہ صرف تجارت کو بلکہ عوامی سطح پر بھی روابط میں تقویت آئے گی۔
دونوں رہنماؤں نے عالمی سطح پر بڑھتی ہوئی کشیدگی، بالخصوص مشرقِ وسطیٰ کی صورتحال پر گہری تشویش کا اظہار کیا، اور اس بات پر اتفاق کیا کہ بے بنیاد معلومات اور سوشل میڈیا کے منفی استعمال کے خلاف عالمی برادری کو حکمتِ عملی مرتب کرنا ہوگی۔
ملاقات میں نیشنل سیکیورٹی ایڈوائزر ڈاکٹر خلیل الرحمٰن، سینئر سیکریٹری و ایس ڈی جی کوآرڈینیٹر لامیا مرشد اور پاکستان کے ہائی کمشنر عمران حیدر بھی موجود تھے۔
یہ دورہ ایسے موقع پر ہوا ہے جب بنگلادیش نے جولائی میں اپنا نیا نیشنل چارٹر منظور کرتے ہوئے ملکی ترقی کے نئے دور کا آغاز کیا ہے۔ اس اعلان نے دونوں ممالک کے درمیان تعلقات کو نئی جہت عطا کی ہے، جس سے مستقبل میں مشترکہ مفادات کے نئے امکانات روشن ہوئے ہیں۔
دیکھیں: فیلڈ مارشل عاصم منیر کا دورۂ مصر، دفاعی تعاون کے فروغ پر اتفاق