پاکستان نے دفاعی چیمپئین جنوبی افریقہ کو 93 رنز سے شکست دے کر نئے سائیکل کا فاتحانہ آغاز کر لیا

لاہور: قومی ٹیم نے شاندار کارکردگی دکھاتے ہوئے جنوبی افریقہ کو پہلے ٹیسٹ میں 93 رنز سے شکست دے کر جیت حاصل کر لی۔

پاکستان نے پہلے بیٹنگ کرتے ہوئے 277 رنز کا ہدف دیا تھا لیکن جنوبی افریقہ کی ٹیم 183 رنز پر ڈھیر ہو گئی۔

چوتھا روز

قذافی اسٹیڈیم لاہور میں کھیلے گئے میچ کے چوتھے روز جنوبی افریقہ نے 16 کے انفرادی اسکور سے ٹونی ڈی زورزی اور 29 رنز سے ریان رکلٹن کے ساتھ اننگز کا آغاز کیا مگر شاہین شاہ آفریدی نے پہلے ہی اوور میں ڈی زورزی کو ایل بی ڈبلیو کر کے کامیابی حاصل کرلی۔

ریکلٹن اور ڈیوالڈ بریوس نے 73 رنز بناتے ہوئے اپنی ٹیم کی جیت کی کوشش کی مگر بریوس 54 رنز پر بولڈ ہو گئے، ان کے آؤٹ ہوتے ہی پروٹیز کی بیٹنگ لائن لڑکھڑا گئی۔

پاکستانی ٹیم کی جانب سے شاہین آفریدی اور نعمان علی نے چار، چار وکٹیں حاصل کیں جبکہ ساجد خان نے دو کھلاڑیوں کو آؤٹ کیا۔

تیسرا روز

جنوبی افریقہ نے پہلی اننگز میں 269 رنز بنائے تھے، جس کے بعد پاکستان کو 109 رنز کی برتری حاصل ہوئی۔
ڈی زورزی 104 رنز کی عمدہ اننگز کھیل کر سب سے آگے رہے جبکہ دوسری جانب نعمان علی نے 6 اور ساجد خان نے 3 وکٹیں حاصل کیں۔

پاکستان کی دوسری اننگز میں امام الحق اور شان مسعود خاطر بہتر کارکردگی نہ دکھا سکے۔ امام الحق صرف 13 اور شان 7 رنز بنا کر آؤٹ ہوئے۔
بابر اعظم نے 42 اور عبداللہ شفیق نے 41 رنز بنائے، تاہم باقی بلے باز بھی کوئی بہتر کارکردگی نہ دکھا سکے اور پوری ٹیم 167 رنز پر آؤٹ ہو گئی۔

دوسرا روز

پاکستان نے اپنی پہلی اننگز 378 رنز پر مکمل کی۔ محمد رضوان نے 75، امام الحق نے 93، شان مسعود نے 76 اور سلمان علی آغا نے 93 رنز کی شاندار اننگز کھیلیں۔

پہلا روز

پاکستان نے ٹاس جیت کر پہلے بیٹنگ کا فیصلہ کیا۔ اوپنر عبداللہ شفیق محض 2 رنز پر ایل بی ڈبلیو ہو گئے، تاہم امام الحق اور شان مسعود نے زبردست بیٹنگ کی۔

کپتان شان مسعود نے میچ کے آغاز پر کہا تھا کہ جنوبی افریقہ کے خلاف کھیلنا ایک بڑا موقع ہے اور ہماری ٹیم کے اسپنرز میچ میں اچھی کارکردگی دکھائیں گے۔

دیکھیں: انگلینڈ کی خواتین کرکٹ ٹیم نے بھارت میں صفائی کے انتظامات کی قلعی کھول دی