پاکستان نے فلسطینی ریاست کے اعلانِ آزادی کی 38ویں سالگرہ کے موقع پر فلسطینی حکومت اور عوام کو مبارکباد پیش کرتے ہوئے آزاد اور خودمختار فلسطینی ریاست کے قیام کے لیے اپنی غیر متزلزل حمایت کا اعادہ کیا ہے۔
دفتر خارجہ کی جانب سے سماجی رابطے کے پلیٹ فارم ایکس پر جاری بیان میں کہا گیا ہے کہ حکومت اور پاکستانی عوام اس اہم موقع پر فلسطینی عوام اور ان کی حکومت کے لیے نیک تمناؤں کا اظہار کرتے ہیں۔
بیان میں کہا گیا کہ پاکستان فلسطینی عوام کے حق خودارادیت کی حمایت پر ثابت قدم ہے اور آزاد و خودمختار فلسطینی ریاست کے قیام کے اپنے اصولی مؤقف پر قائم ہے۔
پاکستان نے ایک بار پھر فلسطینی عوام کی آزادی اور خودمختاری کے حق کی حمایت کا اعادہ کرتے ہوئے اس عزم کا اظہار کیا ہے کہ وہ فلسطینی ریاست کے قیام کے لیے اپنی سفارتی حمایت جاری رکھے گا۔





