اسلام آباد: پاکستان انٹرنیشنل ایئرلائن (پی آئی اے) نے 6 سال کی معطلی کے بعد لندن کیلئے پروازیں بحال کرنے کی تیاریاں مکمل کر لیں، پہلی پرواز آج اسلام آباد سے ہیتھرو ایئرپورٹ کیلئے روانہ ہوگی۔
ترجمان کے مطابق پی آئی اے کا بوئنگ 777 طیارہ دوپہر 12 بجے اسلام آباد سے لندن کیلئے اڑان بھرے گا، جس کے ساتھ اس اہم روٹ کی بحالی کا باقاعدہ آغاز ہوگا۔
اس موقع پر اسلام آباد ایئرپورٹ پر ایک خصوصی تقریب بھی منعقد کی جائے گی، جس میں سیکریٹری دفاع، برطانوی ہائی کمشنر اور ڈی جی سول ایوی ایشن اتھارٹی سمیت اعلیٰ حکام شرکت کریں گے۔
پی آئی اے ہفتہ وار چار براہ راست پروازیں چلائے گی، جن میں اسلام آباد سے تین اور لاہور سے ایک پرواز شامل ہوگی۔
ذرائع کے مطابق افتتاحی پرواز کے تمام ٹکٹس فروخت ہو چکے ہیں جبکہ لندن سے اسلام آباد واپسی کی فلائٹ بھی مکمل طور پر بک ہو چکی ہے، جس سے اس روٹ کی مانگ کا اندازہ لگایا جا سکتا ہے۔
تجزیہ کاروں کے مطابق لندن روٹ کی بحالی پی آئی اے کیلئے ایک بڑی پیشرفت ہے، جس سے نہ صرف قومی ایئرلائن کی ساکھ میں بہتری آئے گی بلکہ بین الاقوامی فضائی روابط بھی مضبوط ہوں گے۔
دیکھئیے:پاکستان کا بڑا تجارتی فیصلہ، ایران و وسطی ایشیا کو برآمدات کیلئے خصوصی رعایت کا اعلان