پمز ہسپتال میں آتشزدگی کے المناک واقعے کی تحقیقات جاری ہیں، جبکہ اعلیٰ سطح کی تحقیقاتی کمیٹی آج وزیراعظم شہباز شریف کو عبوری رپورٹ پیش کرے گی۔
ذرائع کے مطابق کمیٹی نے پمز کے ایگزیکٹو ڈائریکٹر، جوائنٹ ایگزیکٹو ڈائریکٹرز اور متعلقہ طبی افسران کے بیانات قلمبند کر لیے ہیں۔ آگ لگنے کی وجوہات اور ریسکیو کارروائی کا جائزہ لینے کے لیے سی سی ٹی وی فوٹیج بھی دیکھی گئی۔
تحقیقاتی کمیٹی نے فائر بریگیڈ ہیڈکوارٹر کا دورہ بھی کیا، جہاں کیپیٹل ایمرجنسی سروسز کے افسران اور ریسکیو آپریشن میں شریک اہلکاروں کے بیانات ریکارڈ کیے گئے۔
کمیٹی نے آگ لگنے سے لے کر ریسکیو ٹیموں کے پہنچنے تک کی ٹائم لائن، فائر بریگیڈ کے رسپانس اور امدادی کارروائی کے دوران پیش آنے والی مشکلات کا بھی جائزہ لیا۔
وزیراعظم کی ہدایت پر قائم کمیٹی کے سربراہ ریٹائرڈ وفاقی سیکرٹری شاہد خان ہیں، جبکہ میجر جنرل (ر) ڈاکٹر خورشید اُترا، ڈاکٹر بیرسٹر نبیل احمد اعوان اور ڈپٹی کمشنر اسلام آباد بھی کمیٹی میں شامل ہیں۔
حکومتی ہدایات کے مطابق کمیٹی 48 گھنٹوں میں عبوری رپورٹ پیش کرے گی، جبکہ پانچ روز میں مکمل تحقیقات اور سفارشات پر مشتمل حتمی رپورٹ وزیراعظم کو دی جائے گی۔
یاد رہے کہ پمز کے مدر اینڈ چائلڈ ہیلتھ سینٹر میں آتشزدگی کے واقعے میں متعدد نومولود بچے جاں بحق ہوئے تھے، جس کے بعد حکومت نے اعلیٰ سطح کی تحقیقات کا حکم دیا تھا۔
