بلوچستان کے ضلع پشین میں سکیورٹی فورسز نے خفیہ اطلاع کی بنیاد پر کارروائی کرتے ہوئے فتنہ الہندوستان سے تعلق رکھنے والے 6 دہشت گردوں کو ہلاک کر دیا۔ سکیورٹی ذرائع کے مطابق ہلاک ہونے والے دہشت گرد پشین میں مزدوروں کے قتل سمیت دہشت گردی کی متعدد کارروائیوں میں ملوث تھے۔
ذرائع کے مطابق دہشت گردوں کی موجودگی کی اطلاع ملنے پر سکیورٹی فورسز نے علاقے میں انٹیلی جنس بیسڈ آپریشن کیا۔ کارروائی کے دوران دہشت گردوں اور سکیورٹی فورسز کے درمیان فائرنگ کا تبادلہ ہوا، جس کے بعد فورسز نے مؤثر کارروائی کرتے ہوئے 6 دہشت گردوں کو ہلاک کر دیا۔ آپریشن مکمل ہونے کے بعد سکیورٹی فورسز نے علاقے کو گھیرے میں لے کر سرچ اینڈ کلیئرنس آپریشن بھی کیا۔
اسلحہ اور گولہ بارود برآمد
ہلاک دہشت گردوں کے قبضے سے اسلحہ، گولہ بارود اور دیگر جنگی سامان برآمد کیا گیا ہے، جبکہ علاقے میں موجود ممکنہ سہولت کاروں اور دیگر دہشت گردوں کی تلاش جاری ہے۔
سکیورٹی ذرائع کے مطابق اس کارروائی سے علاقے میں سرگرم دہشت گرد نیٹ ورک کو سخت دھچکا پہنچا ہے۔ سکیورٹی فورسز نے اس عزم کا اظہار کیا ہے کہ دہشت گردی کے مکمل خاتمے، شہریوں کے تحفظ اور بلوچستان میں امن و امان کے قیام کے لیے انٹیلی جنس بنیادوں پر کارروائیاں بلاامتیاز جاری رکھی جائیں گی۔
دیکھیے: بنوں میں دہشت گردی کا منصوبہ ناکام، موٹر سائیکل سے بارودی مواد برآمد
