سکیورٹی فورسز نے بلوچستان کے ضلع پشین میں انٹیلی جنس بیسڈ آپریشن کے دوران فتنہ الخوارج کے پانچ دہشت گردوں کو ہلاک کر دیا ہے۔ آئی ایس پی آر کے مطابق مذکورہ کاروائی 22 فروری 2026 کو کی گئی، جہاں بھارتی سرپرستی میں سرگرم خوارج کی موجودگی کی اطلاع موصول ہوئی تھی۔
آئی ایس پی آر کے مطابق دورانِ آپریشن سکیورٹی فورسز نے دہشت گردوں کی پوری گروہ کو نشانہ بنایا۔ فائرنگ کے تبادلے کے دوران ایک خودکش بمبار خارجی نے اپنے خود کو دھماکے سے اڑا لیا، جبکہ فورسز کی جوابی کاروائی میں مزید چار خوارج ہلاک ہو گئے۔ ہلاک ہونے والے دہشت گردوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا ہے۔
تفتیشی حکام کا کہنا ہے کہ یہ عناصر علاقے میں دہشت گردی کی متعدد کاروائیوں میں ملوث رہے تھے۔ علاقے میں موجود کسی بھی دیگر ممکنہ دہشت گرد کے خاتمے کے لیے کلیئرنس اور سرچ آپریشن تاحال جاری ہے۔
آئی ایس پی آر نے اپنے بیان میں واضح کیا ہے کہ نیشنل ایکشن پلان کی وفاقی ایپکس کمیٹی سے منظور شدہ وژن “عزمِ استحکام” کے تحت سکیورٹی فورسز اور قانون نافذ کرنے والے اداروں کی جانب سے دہشت گردی کے خلاف بلاامتیاز کاروائیاں پوری شدت کے ساتھ جاری رہیں گی۔ بیان میں اس عزم کا اعادہ کیا گیا ہے کہ ملک سے بیرونی سرپرستی میں جاری دہشت گردی کے ناسور کا مکمل خاتمہ یقینی بنایا جائے گا۔
دیکھیے: بلوچستان: کوئٹہ اور بارکھان میں سی ٹی ڈی کا آپریشن، 14 دہشت گرد ہلاک