اسلام آباد: وزیراعظم شہباز شریف اہم سرکاری دورے پر سعودی عرب پہنچ گئے ہیں، جبکہ دوسری جانب امریکا اور ایران کے درمیان مذاکرات کے سلسلے میں پاکستان کا اعلیٰ سطح کا وفد فیلڈ مارشل عاصم منیر کی قیادت میں تہران پہنچ گیا ہے، جہاں اہم سفارتی مشاورت جاری ہے۔
جدہ میں کنگ عبدالعزیز انٹرنیشنل ایئرپورٹ پر گورنر جدہ نے وزیراعظم شہباز شریف کا استقبال کیا۔ وزیراعظم آج سعودی ولی عہد محمد بن سلمان سے ملاقات کریں گے، جس میں دوطرفہ تعلقات، علاقائی صورتحال اور امن و سلامتی کے امور پر تبادلہ خیال متوقع ہے۔
وزیراعظم شہباز شریف 15 سے 18 اپریل تک سعودی عرب، قطر اور ترکیے کے دورے پر ہیں۔ ان کے ہمراہ نائب وزیراعظم و وزیر خارجہ اسحاق ڈار، وزیر اطلاعات عطا تارڑ اور معاون خصوصی طارق فاطمی بھی موجود ہیں۔ حکام کے مطابق وزیراعظم سعودی عرب اور قطر میں قیادت سے ملاقاتوں کے دوران باہمی تعاون اور خطے میں امن کے فروغ پر بات کریں گے۔
دوسری جانب پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر ایران پہنچ گئے ہیں، جہاں وہ اعلیٰ سطح کے وفد کے ہمراہ امریکا اور ایران کے درمیان جاری مذاکراتی عمل میں پاکستان کے کردار کو آگے بڑھا رہے ہیں۔ وفاقی وزیر داخلہ محسن نقوی بھی اس وفد کا حصہ ہیں۔
عرب میڈیا اور الجزیرہ کے مطابق پاکستانی وفد تہران میں ایران اور امریکا کے درمیان مذاکرات کی بحالی اور پیشرفت سے متعلق اہم بات چیت کرے گا۔ ایرانی وزارت خارجہ کے ترجمان اسماعیل بقائی کے مطابق پاکستان کے ذریعے دونوں ممالک کے درمیان پیغامات کا تبادلہ جاری ہے اور ایران پاکستانی وفد کی میزبانی کر رہا ہے۔
ذرائع کے مطابق ایران اور امریکا کے درمیان مذاکرات کا دوسرا دور آئندہ چند دنوں میں اسلام آباد میں متوقع ہے، جس کے لیے سفارتی سرگرمیاں تیز کر دی گئی ہیں۔
واضح رہے کہ وزیراعظم شہباز شریف اپنے دورہ ترکیے کے دوران انطالیہ ڈپلومیسی فورم میں بھی شرکت کریں گے، جہاں ان کی ترک صدر رجب طیب اردوان سمیت دیگر عالمی رہنماؤں سے ملاقاتیں متوقع ہیں۔
دیکھئیے:شہباز شریف کا سعودی عرب، قطر اور ترکیہ کا اہم دورہ، اعلیٰ سطح وفد کے ہمراہ روانہ
