وزیراعظم شہباز شریف کی ایک بار پھر اپوزیشن کو مذاکرات کی دعوت

وزیراعظم شہباز شریف نے اپوزیشن کو ایک بار پھر مذاکرات کی دعوت دیتے ہوئے کہا ہے کہ اپوزیشن ہمارے ساتھ بیٹھ کر بات کرے تاکہ جمہوریت کو تقویت دی جا سکے۔

وفاقی کابینہ اجلاس سے خطاب کرتے ہوئے وزیراعظم نے کہا کہ ان کی حکومت اپوزیشن کے ساتھ بامقصد مذاکرات کے لیے تیار ہے۔ ان کا کہنا تھا کہ تالی دونوں ہاتھوں سے بجتی ہے، اب یہ اپوزیشن پر منحصر ہے کہ وہ کب تک میز پر آتی ہے۔

وزیراعظم نے کہا کہ تاجر برادری کے لیے ایک اچھی اسکیم لائی گئی ہے اور تاجروں کو پریشان کرنے پر سخت کارروائی کی جائے گی۔ انہوں نے ایف بی آر کو ہدایت دی کہ تاجر برادری کو ہراساں نہ کیا جائے۔

معیشت میں بہتری

شہباز شریف نے کہا کہ معیشت کے استحکام کے لیے اہم اقدامات کیے گئے ہیں اور عوام کو ریلیف دینے کے لیے 128 ارب روپے مختص کیے گئے ہیں۔ ان کا کہنا تھا کہ ملکی معیشت میں آہستہ آہستہ بہتری آ رہی ہے اور آئندہ دنوں میں صورتحال مزید بہتر ہونے کی امید ہے۔ انہوں نے ڈیزل کی قیمت میں کمی کو بھی خوش آئند قرار دیا۔

وزیراعظم نے مزید کہا کہ خطے میں کشیدگی کی وجہ سے تیل کی سپلائی پر بھی اثرات مرتب ہو رہے ہیں۔

دیکھیے: عمران خان کی ہسپتال منتقلی، سپریم کورٹ نے حکومتی درخواست واپس کردی