صدر زرداری کی ازبک سفیر سے ملاقات، تجارت اور ٹرانس افغان ریلوے منصوبے پر تعاون بڑھانے پر زور

اسلام آباد: صدر مملکت آصف علی زرداری سے ازبکستان کے سفیر علی شیر تختایف نے ملاقات کی، جس میں دوطرفہ تعلقات، تجارت، علاقائی روابط اور سرمایہ کاری کے فروغ پر اتفاق کیا گیا، جبکہ ٹرانس افغان ریلوے منصوبے کی حمایت کا اعادہ بھی کیا گیا۔

ملاقات کے دوران صدر زرداری نے پاکستان اور ازبکستان کے درمیان مضبوط تعلقات کو مزید وسعت دینے پر زور دیا۔ انہوں نے کہا کہ دونوں ممالک کے درمیان تجارت، علاقائی رابطوں اور سرمایہ کاری کے مواقع کو بڑھانا وقت کی ضرورت ہے۔

صدر مملکت نے ٹرانس افغان ریلوے منصوبے کی اہمیت کو اجاگر کرتے ہوئے اس کے لیے پاکستان کی مکمل حمایت کا اعادہ کیا اور متعلقہ حکام کو ہدایت کی کہ ان کے مجوزہ دورہ ازبکستان کو رواں سال حتمی شکل دی جائے۔

اس موقع پر ازبک سفیر نے خطے میں امن و استحکام کے لیے پاکستان کے کردار کو سراہا اور دوطرفہ تعاون کو مزید مضبوط بنانے کے عزم کا اظہار کیا۔

واضح رہے کہ پاکستان اور ازبکستان کے درمیان حالیہ برسوں میں علاقائی رابطوں اور اقتصادی تعاون کے حوالے سے پیشرفت دیکھنے میں آئی ہے، خاص طور پر ٹرانس افغان ریلوے منصوبہ دونوں ممالک کے لیے اہم سمجھا جاتا ہے۔

دیکھئیے:خطے میں امن کی کوششیں: فیلڈ مارشل عاصم منیر تہران پہنچ گئے، وزیراعظم شہباز شریف بھی اہم دورے پر سعودی عرب پہنچ چکے ہیں