اسلام آباد: وزیراعظم شہباز شریف سے سعودی عرب کے وزیر خزانہ شیخ محمد بن عبد اللہ الجدعان نے اہم ملاقات کی، جس میں دوطرفہ تعلقات، معاشی تعاون اور خطے کی موجودہ صورتحال پر تفصیلی تبادلہ خیال کیا گیا۔
ملاقات میں نائب وزیراعظم و وزیر خارجہ اسحاق ڈار اور چیف آف ڈیفنس فورسز فیلڈ مارشل سید عاصم منیر بھی شریک ہوئے، جس سے اس بات کا اظہار ہوتا ہے کہ دونوں ممالک کے درمیان تعلقات کو اسٹریٹجک سطح پر مزید مضبوط کیا جا رہا ہے۔
اعلامیے کے مطابق وزیراعظم شہباز شریف نے خادم حرمین شریفین شاہ سلمان بن عبد العزیز اور سعودی ولی عہد شہزادہ محمد بن سلمان کیلئے نیک خواہشات اور احترام کا اظہار کیا، جبکہ حالیہ اعلیٰ سطحی روابط اور ملاقاتوں کا بھی تذکرہ کیا۔
وزیراعظم نے سعودی عرب کی جانب سے پاکستان کو فراہم کی جانے والی مالی و اقتصادی معاونت کو سراہتے ہوئے کہا کہ اس تعاون نے پاکستان کے معاشی استحکام میں کلیدی کردار ادا کیا ہے۔
انہوں نے کہا کہ پاکستان کے عوام ہر حال میں اپنے سعودی بہن بھائیوں کے ساتھ شانہ بشانہ کھڑے ہیں، اور شہزادہ محمد بن سلمان کی قیادت میں دونوں ممالک کے درمیان باہمی احترام اور اعتماد پر مبنی تعلقات مزید مستحکم ہوئے ہیں۔
ملاقات میں دونوں رہنماؤں نے تجارت، سرمایہ کاری اور اقتصادی ترقی کے شعبوں میں تعاون کو مزید فروغ دینے پر اتفاق کیا، جبکہ مختلف شعبوں میں شراکت داری کو وسعت دینے کے عزم کا اعادہ بھی کیا گیا۔
ذرائع کے مطابق موجودہ علاقائی کشیدگی کے تناظر میں پاکستان اور سعودی عرب کے درمیان قریبی مشاورت جاری ہے، اور دونوں ممالک خطے میں امن و استحکام کیلئے سفارتی سطح پر تعاون بڑھانے پر متفق ہیں۔
تجزیہ کاروں کے مطابق یہ ملاقات نہ صرف دوطرفہ تعلقات بلکہ خطے میں جاری سفارتی کوششوں کے حوالے سے بھی اہم پیش رفت قرار دی جا رہی ہے۔
