اسلام آباد: پاکستان، سعودی عرب، ترکیے اور مصر کے سینئر حکام کا اہم اجلاس اسلام آباد میں منعقد ہوا، جس میں باہمی تعاون، سفارتی روابط اور علاقائی امور پر تفصیلی مشاورت کی گئی، جبکہ آئندہ وزرائے خارجہ اجلاس کے ایجنڈے کو بھی حتمی شکل دینے پر غور کیا گیا۔
وزارت خارجہ کے اعلامیے کے مطابق یہ اجلاس 29 مارچ کو ہونے والے وزرائے خارجہ کے مشاورتی اجلاس کے تسلسل میں منعقد کیا گیا۔ اجلاس میں چاروں ممالک کی وزارت خارجہ کے سینئر حکام نے شرکت کی اور مختلف امور پر تبادلہ خیال کیا۔
اعلامیے میں کہا گیا کہ پاکستانی وفد کی قیادت ایڈیشنل سیکریٹری و ترجمان طاہر اندرابی نے کی، جبکہ ترکیے، مصر اور سعودی عرب کے وفود کی سربراہی بالترتیب نائب وزیر خارجہ موسیٰ کولاکالکایا، اسسٹنٹ وزیر خارجہ نازح النجار اور سعودی وزارت خارجہ کے ڈائریکٹر جنرل ڈاکٹر عبداللہ بن خالد السعود نے کی۔
حکام کے مطابق اجلاس میں ہونے والی مشاورت کو آئندہ وزرائے خارجہ اجلاس میں پیش کیا جائے گا، جو 17 اپریل کو ترکیے کے شہر انطالیہ میں انطالیہ ڈپلومیسی فورم کے موقع پر منعقد ہوگا۔
اعلامیے کے مطابق سینئر حکام نے نائب وزیراعظم و وزیر خارجہ اسحاق ڈار اور سیکریٹری خارجہ آمنہ بلوچ سے بھی مشترکہ ملاقات کی، جس میں جاری سفارتی عمل اور آئندہ لائحہ عمل پر تبادلہ خیال کیا گیا۔
دوسری جانب ذرائع کے مطابق انطالیہ میں ہونے والے وزرائے خارجہ اجلاس میں ایران اور امریکا کے درمیان کشیدگی کم کرنے اور مذاکرات کی بحالی سے متعلق امور بھی زیر غور آ سکتے ہیں، تاہم اس حوالے سے باضابطہ ایجنڈا جاری نہیں کیا گیا۔
واضح رہے کہ چاروں ممالک کے وزرائے خارجہ کی یہ ملاقات خطے میں جاری سفارتی سرگرمیوں کے تناظر میں اہم پیشرفت سمجھی جا رہی ہے۔
دیکھئیے:رطانوی وزیراعظم کا مشرقِ وسطیٰ میں کشیدگی کم کرنے پر پاکستان کا شکریہ، سفارتی کوششوں کی ستائش