بلوچستان کی طالبہ ارپنگا بریال کی عالمی کامیابی، سائنس اولمپیاڈ میں سلور میڈل حاصل کر لیا

کوئٹہ سے تعلق رکھنے والی جماعت ششم کی طالبہ ارپنگا بریال نے امریکا میں منعقد ہونے والے عالمی سائنس مقابلے کوپرنیکس نیچرل سائنس اولمپیاڈ (Copernicus Natural Science Olympiad) میں سلور میڈل جیت کر پاکستان اور خصوصاً بلوچستان کا نام روشن کر دیا۔

ارپنگا بریال نے امریکی شہر ہیوسٹن میں منعقدہ ساتویں کوپرنیکس نیچرل سائنس اولمپیاڈ میں پاکستان کی نمائندگی کی، جہاں دنیا کے 50 سے زائد ممالک سے تعلق رکھنے والے طلبہ و طالبات نے حصہ لیا۔ سخت مقابلے کے باوجود ارپنگا بریال نے اپنی صلاحیتوں کا لوہا منواتے ہوئے عالمی سطح پر نمایاں کامیابی حاصل کی۔

تعلیمی حلقوں کے مطابق ارپنگا بریال کی یہ کامیابی بلوچستان کے طلبہ کی پوشیدہ تعلیمی صلاحیتوں اور سائنسی استعداد کا منہ بولتا ثبوت ہے، جو محدود وسائل کے باوجود عالمی معیار پر خود کو منوانے کی بھرپور صلاحیت رکھتے ہیں۔ اس کامیابی نے نہ صرف صوبے بلکہ پورے ملک کے لیے فخر کا باعث بن کر نئی نسل کو حوصلہ دیا ہے۔

اپنے تعلیمی دورے کے دوران ارپنگا بریال کو ناسا کے جانسن اسپیس سینٹر کا دورہ کرنے کا موقع بھی ملا، جہاں انہوں نے خلائی تحقیق اور جدید سائنسی منصوبوں کے بارے میں براہِ راست معلومات حاصل کیں۔ یہ تجربہ ان کے لیے سائنسی دلچسپی اور مستقبل کے اہداف کے تعین میں نہایت اہم قرار دیا جا رہا ہے۔

ماہرین تعلیم کا کہنا ہے کہ ارپنگا بریال کی کامیابی اس امر کی واضح نشاندہی کرتی ہے کہ اگر نوجوانوں کو مناسب مواقع، رہنمائی اور معاونت فراہم کی جائے تو وہ عالمی سطح پر نمایاں کارکردگی دکھا سکتے ہیں۔ بلوچستان کی اس طالبہ کی کامیابی کو نئی نسل کے لیے مشعلِ راہ قرار دیا جا رہا ہے، جو آنے والے وقت میں مزید نوجوانوں کو علم اور تحقیق کی راہ پر گامزن ہونے کی ترغیب دے گی۔

دیکھیے: بلوچستان میں بی ایل اے دہشت گردوں کی بزدلانہ کارروائی، خاتون کو اغوا کر لیا