طالبان کے سربراہ ملا ہیبت اللہ آخوندزادہ نے افغانستان کے انتظامی ڈھانچے میں بڑے پیمانے پر تبدیلیاں کرتے ہوئے اہم عہدوں پر نئی تعیناتیوں کا حکم دیا ہے۔ اس تازہ ترین حکم نامے کے تحت وزیر مواصلات حمد اللہ نعمانی کو ان کے عہدے سے برطرف کر دیا گیا ہے۔ حمد اللہ نعمانی، جن کا تعلق صوبہ غزنی سے ہے، طالبان کے پہلے دورِ حکومت میں بھی اسی منصب پر فائز رہے تھے اور انہیں 2024 میں دوبارہ یہ ذمہ داری سونپی گئی تھی۔ ان کی جگہ اب فاریاب کے سابق گورنر مولوی عبدالاحد فضلی کو نیا وزیر مواصلات مقرر کیا گیا ہے۔
صوبائی گورنرز کی اکھاڑ پچھاڑ
حکم نامے کے مطابق متعدد صوبوں کے گورنرز کے تبادلے کیے گئے ہیں۔ مولوی محمد حنیف حمزہ کو بادغیس سے تبدیل کر کے فاریاب کا گورنر لگایا گیا ہے، جبکہ مولوی عبدالرحمٰن حقانی کو بغلان سے خوست اور مولوی عبداللہ مختار کو خوست سے بغلان کا گورنر تعینات کیا گیا ہے۔ اسی طرح معاشی مشیر مولوی محمد ولی جان کو صوبہ بادغیس کی گورنری سونپی گئی ہے، جبکہ پکتیکا کے معاون گورنر مخدوم عبدالسلام سعادت کو وزارتِ ارشاد، حج و اوقاف میں ڈائریکٹر کے عہدے پر منتقل کر دیا گیا ہے۔
پولیس اور سیکیورٹی بیوروکریسی میں ردوبدل
سیکیورٹی کے شعبے میں بھی اہم تبدیلیاں دیکھنے میں آئی ہیں، جہاں 5 پولیس کمانڈرز کے تبادلے کیے گئے ہیں۔ میدان وردگ کے پولیس چیف مولوی عبدالقیوم ہلال اب بغلان میں ذمہ داریاں نبھائیں گے، جبکہ بغلان کے پولیس چیف مولوی عبدالحق کو میدان وردگ منتقل کر دیا گیا ہے۔ نیمروز کے پولیس چیف مولوی عبدالظاہر مدثر کو میدان وردگ کا معاون گورنر، جبکہ جیل خانہ جات کے ڈائریکٹر مولوی محمد عمر مخلص کو نیمروز کا نیا پولیس چیف مقرر کیا گیا ہے۔ لوگر کے پولیس چیف مولوی آغا ولی حنفی کو اب محکمہ جیل خانہ جات کا نیا ڈائریکٹر تعینات کیا گیا ہے۔
معاون گورنرز اور عسکری تعیناتیاں
انتظامی اصلاحات کے اس سلسلے میں پکتیا، لوگر، ہلمند، فراہ اور بغلان کے معاون گورنرز کے بھی تبادلے کیے گئے ہیں۔ مولوی انعام اللہ صلاح الدین کو پکتیا سے لوگر، اور مولوی محمد انور کو لوگر سے پکتیا کا معاون گورنر لگایا گیا ہے۔ ہلمند کے معاون گورنر مولوی محمد نبی حماس اب بغلان میں خدمات انجام دیں گے، جبکہ مولوی رحیم اللہ محمود کو فراہ سے ہلمند منتقل کیا گیا ہے۔ عسکری سطح پر 203 منصوری کور کے تھرڈ بریگیڈ کے چیف مولوی محمد گل خیبر کو فراہ کا معاون گورنر مقرر کیا گیا ہے، جبکہ ان کی سابقہ جگہ بغلان کے سابق معاون گورنر مولوی محمد ہمایوں جہادیار لیں گے۔ پکتیکا میں شوریٰ علماء کے رکن قاضی نور اللہ کو اسی صوبے کا معاون گورنر تعینات کیا گیا ہے۔