طالبان حکومت نے ایک متنازعہ نظریاتی قدم اٹھاتے ہوئے تمام سرکاری اداروں کے ناموں سے لفظ قومی کو حذف کرنے کا عمل شروع کر دیا ہے۔ طالبان کے سپریم لیڈر ملا ہبت اللہ اخوندزادہ کے حالیہ فرمان کے بعد جاری ہونے والے سرکاری خطوط سے واضح ہوتا ہے کہ اب تمام سرکاری اداروں کے ناموں سے لفظ قومی کو حذف کرنے کا حکم دے دیا ہے، جس کے بعد ‘نیشنل اسٹیٹسٹکس اینڈ انفارمیشن اتھارٹی’ اور ‘نیشنل ایگزامینیشن اتھارٹی’ جیسے کلیدی اداروں کے نام تبدیل کر کے ‘جنرل’ کر دیے گئے ہیں۔ اس فیصلے کو ماہرین افغان تاریخ پر حملہ اور عالمی نظام سے بغاوت قرار دے رہے ہیں۔
واضح رہے کہ لفظ قومی دہائیوں سے افغان تاریخ، ثقافت اور ریاستی شناخت کا لازمی جزو رہا ہے۔ تجزیہ کاروں کے مطابق اسے ہٹانا افغان عوام کی تاریخی جڑوں کو کاٹنے کی ایک مذموم کوشش ہے۔ یہ اقدام ثابت کرتا ہے کہ طالبان عوامی امنگوں اور قومی جذباتی وابستگی کے بجائے اپنا مخصوص نظریہ زبردستی تھوپ رہے ہیں، جس سے سماجی سطح پر شدید بے چینی پیدا ہونے کا خدشہ ہے۔
عالمی تنہائی اور سفارتی بحران
طالبان کا جدید قومی ریاست کے تصور کو مسترد کرنا بین الاقوامی برادری کے لیے ایک بڑا پیغام ہے۔ جب طالبان ریاست اور سرحدوں کے جغرافیائی وجود کو تسلیم کرنے سے انکار کرتے ہیں تو ان کی حکومت کو عالمی سطح پر تسلیم کیے جانے کے امکانات معدوم ہو جاتے ہیں۔ یہ نظریہ پڑوسی ممالک، بشمول پاکستان، ایران اور وسطی ایشیائی ریاستوں کے ساتھ سرحدوں پر عدم تحفظ اور مستقبل کے تنازعات کو جنم دے سکتا ہے۔
داعش اور القاعدہ میں مماثلت
اس فیصلے کا سب سے خطرناک پہلو طالبان کے نظریات کا داعش اور القاعدہ جیسی عالمی دہشت گرد تنظیموں کے مماثل ہونا ہے۔ نیشن اسٹیٹ کے ماڈل کو مسترد کر کے الٰہی اور مذہبی اتھارٹی پر مبنی حکمرانی کا تصور درحقیقت اسی عالمی خلافت کے نظریے کی عکاسی ہے جو بین الاقوامی عسکریت پسندی کو فروغ دیتا ہے۔ یہ عالمی برادری کے لیے ایک سکیورٹی الارم ہے کہ طالبان سرحدوں کی قید سے آزاد ایک انتہا پسند نظام کی جانب بڑھ رہے ہیں۔
عوامی مسائل سے چشم پوشی
افغانستان اس وقت بدترین معاشی بحران اور انسانی المیے کی زد میں ہے، جہاں کروڑوں لوگ غربت کا شکار ہیں۔ ایسے میں عوامی فلاح و بہبود کے بجائے اداروں کے نام بدلنا حکومتی ترجیحات کے تضاد کو ظاہر کرتا ہے۔ ماہرین کا کہنا ہے کہ اس تبدیلی سے نہ صرف عالمی اداروں کے ساتھ خط و کتابت میں انتظامی الجھنیں پیدا ہوں گی بلکہ یہ “بقا کی معیشت” کے لیے بھی نقصان دہ ثابت ہوگا۔
قانونی جواز اور اندرونی تضادات
جدید دور میں عوامی رضامندی کے بغیر کسی بھی حکومت کا استحکام ناممکن ہے۔ طالبان کا “الٰہی طاقت” کے نام پر مطلق العنان نظام اور انسانی حقوق کی نفی انہیں ایک جابرانہ ڈھانچے میں تبدیل کر رہی ہے۔ یہ سخت گیر فیصلے خود طالبان کے اندر ان عناصر کے لیے بھی پریشانی کا باعث بن سکتے ہیں جو عالمی برادری کے ساتھ معتدل تعلقات کے حامی ہیں۔
نتیجہ طالبان کا یہ قدم افغانستان کو ایک جدید ریاست کے بجائے ایک بند نظریاتی قلعے میں تبدیل کرنے کی جانب اشارہ ہے۔ لفظ “ملی” کا خاتمہ درحقیقت اس سماجی معاہدے کا خاتمہ ہے جو ایک ریاست کو اس کے شہریوں اور عالمی دنیا سے جوڑتا ہے۔ اگر کابل انتظامیہ نے اپنی ان پالیسیوں پر نظرثانی نہ کی تو افغان عوام کی معاشی اور سفارتی تنہائی میں مزید ہولناک اضافہ ہو جائے گا۔