ٹرمپ کا اتحادیوں پر سخت وار، برطانیہ اور فرانس کو دھمکی؛ “ہم سے فیول خریدو یا خود ہرمز جاؤ”

واشنگٹن: امریکی صدر ڈونلڈ ٹرمپ نے ایران جنگ میں مکمل حمایت نہ کرنے پر برطانیہ اور فرانس کو سخت تنقید کا نشانہ بناتے ہوئے واضح کیا ہے کہ امریکا اب ہر ملک کی مدد نہیں کرے گا۔

سوشل میڈیا پر جاری بیان میں ٹرمپ نے کہا کہ برطانیہ نے ایران کی حکومت گرانے کی مہم میں شامل ہونے سے انکار کیا جبکہ فرانس نے اسرائیل کے لیے فوجی سامان لے جانے والے طیاروں کو اپنی فضائی حدود استعمال کرنے کی اجازت نہیں دی۔

ٹرمپ نے کہا کہ ایسے ممالک کو اب فیصلہ کرنا ہوگا کہ وہ امریکا سے جیٹ فیول خریدیں یا خود آبنائے ہرمز جا کر تیل حاصل کریں، کیونکہ امریکا اب ان کی مدد کیلئے تیار نہیں۔

انہوں نے کہا کہ امریکا کے پاس وافر مقدار میں فیول موجود ہے، تاہم جو ممالک ساتھ نہیں کھڑے ہوئے انہیں اب خود اپنے فیصلوں کا بوجھ اٹھانا ہوگا۔

ٹرمپ نے کہا کہ امریکا اب ہر ملک کی مدد نہیں کرے گا، آپ کو خود لڑنا سیکھنا ہوگا، امریکا اب آپ کی مدد کے لیے موجود نہیں ہو گا، بالکل اسی طرح جیسے آپ ہمارے ساتھ نہیں تھے۔

امریکی صدر نے فرانس کو خاص طور پر تنقید کا نشانہ بناتے ہوئے کہا کہ وہ ایران کے معاملے پر “غیر مددگار” رہا اور واشنگٹن اس رویے کو یاد رکھے گا۔

ٹرمپ نے مزید دعویٰ کیا کہ ایران بڑی حد تک تباہ ہو چکا ہے اور جنگ کا مشکل مرحلہ مکمل ہو چکا ہے، جبکہ اب دیگر ممالک کو اپنے مفادات کے تحفظ کیلئے خود اقدامات کرنا ہوں گے۔

تجزیہ کاروں کے مطابق ٹرمپ کا یہ سخت لہجہ نہ صرف مغربی اتحادیوں کے درمیان اختلافات کو ظاہر کرتا ہے بلکہ عالمی سطح پر اتحاد میں دراڑوں کی بھی نشاندہی کرتا ہے، خاص طور پر ایسے وقت میں جب مشرق وسطیٰ میں کشیدگی عروج پر ہے۔

دیکھئیے:ایران نے جلد معاہدہ نہ کیا تو تمام توانائی تنصیبات کو تباہ کردیں گے: ٹرمپ کی دھمکی